Ibikorwa bwo kwubaka iyo ngoro y'Imana bishitse ku rugero rwa 88%, hakaba hariko hategurwa Harambe «Spécial Pâque» yo kurondera uburyo bwo kuyiheraheza ngo bikunde izokwinjirwe muri iyi Rusama

Ibikorwa vy'urwubako rw'ingoro y'Imana nshasha ya Paruwase Buterere bishitse ku ntambwe ishimishije, kuko gushika ubu bisa n'ibiri ku musozo, ku rugero rwa 88% ufatiye ku bisigaye. Ivyo ni ivyamenyeshejwe n’umushingantahe Céléus Hakizimana ajejwe ivy'inyubako muri Paruwase akaba no mu nama ntunganyabutunzi ya Paruwase, aho umugwi ujejwe amakuru muri Paruwase wari uramutse uja kwirabira ukuntu ivyo bikorwa biriko biragenda, ku wa gatanu igenekerezo rya 20 Ntwarante 2026.

Ni mu gihe hariko hategurwa Harambe bise «Spécial Pâque», yo kurondera uburyo bungana n'imilliyoni 180 z'amafaranga y'amarundi (180.000.000 FBU) yo guheraheza iyo nyubakwa. Hakaba hariko haterezwa incuti n'abagenzi kugira isango ya 23 Rusama 2026 bizokunde yinjirwe, na Nyenicubahiro Musenyeri Mukuru wa Diyoseze Nkuru ya Bujumbura akaba yaremeye ko kuri iyo sango azoza kuyihezagira.

Tubamenyeshe ko umugambi wo kwubaka ingoro y'Imana mu buryo bwa none bugeretse (en étages) watanguye gushirwa mu ngiro kuva ku wa 23 Munyonyo 2023. Ni ho hatangura ibikorwa vyo gusambura Ingoro y'Imana yari ihari ico gihe, no kwubaka ingoro y'Imana nshasha y’Imana ya Paruwasi, bikaba vyakorwa n'abakristu ubwabo.

Iyo ngoro y'Imana iri mu rukurikirane rw'izindi ngoro z'Imana abakristu bagiye barasengeramwo kuva Paruwase Buterere ikiri ishure tabariro gushika ishike ku rugero  rwa  Paruwase.

Ingoro y'Imana ya mbere cari igiti, aho basengera munsi yaco, hakurikira iyubakishijwe ibiti, mu nyuma iy’amatafari y'ivyondo, hanyuma amatafari aturiye, gushika ubu rero yubatswe mu buryo bwa none (en étages), ari yo igiye kuzokwinjirwa ku wa 23 Rusama 2026.

Abanyamuryango wa Paruwase Buterere bakaba batera akamo incuti n’abagenzi, aba hafi n'abari kure, gushigikira ivyo bikorwa vy'Umukama ariko yikorera muri iyo Paruwase yitiriwe Yohani Pawulo wa II, aciye ku bana bayo.

Claude Nsengiyumva, Buterere

Ivyiyumviro

Rondera

Urutonde rw'Imisa

Mwoba mufise ico mubaza?

Tanga