Ku wa kane igenekerezo rya 19 Ntwarante 2026, ku gihe c’isaha icumi n’imwe z’umugoroba (17h00), Paruwase Mikaheli mweranda yagorobeje mu kanyamuneza ko kwinjira inyubakwa y’ubutumwa bw’imihari n’imigwi, mu birori vyari bihagarariwe na Nyenicubahiro Musenyeri Gervais Banshimiyubusa, iyo nyubakwa ikaba yaritiriwe abamalayika bakuru («Centre des Archanges») mu gifaransa, yongera irangizwa Yozefu mweranda ngo ayibere umuvunyi.

Uwo Mwepiskopi Mukuru wa Diyoseze Nkuru ya Bujumbura yari kumwe n’Umwepiskopi Mukuru w’inarabibonye w’iyo Diyoseze, Nyenicubahiro Musenyeri Evariste Ngoyagoye, kumwe n’icariho c’Umwepiskopi Mukuru, Musenyeri Anatole Ruberinyange, be na Patiri Mukuru wa Paruwase Mikaheli Mweranda, Patiri Thomas Niragira, n’abandi basaserdoti n’abatumire b’iteka batandukanye bari baje gutera iteka ivyo birori.

Inkuka y’imisa y’umusi mukuru wa Yozefu Mweranda mw’isengero ya paruwase be n’imigirwa yo guhezagira iyo nyubakwa n’abazoyikoreramwo ubutumwa be no kubasabira ni vyo vyaranze uwo mugoroba, bisozererwa ku kwinjira iyo nyubakwa no kuyigina.

Umwepiskopi mukuru ahejeje guhezagira iyo nyubakwa, Patiri mukuru yaciye ayugurura, haca hakurikira kuyihezagiza amazi ahezagiye mu guca mu birasi bigize iyo nyubakwa kuva hasi gushika hejuru.

Amajambo atandukanye yarashikirijwe mu ntumebero yo gukengurukira abakristu n’abakunzi ba Paruwase Mikaheli Mweranda bitanze kuva umugambi uciyumvirwa gushika ushirwe mu ngiro.

Musenyeri Gervais Banshimiyubusa yarakengurukiye abantu b’umutima mwiza bitangira Paruwase ku buryo buboneka, yongera arakeza abanyeparuwase ko ari abantu bashoboye. Ibirori vyasozerewe ku gusangira neza ivyo Imana yabahaye.

Bodin Fustel Akimana, Paruwase Mikaheli mweranda