Mu Nkenga hariho umugambi wo kuhubaka ingoro y'Imana, na cane cane ko Nkenga ari kimwe mu bisata vy’amaparuwase vyahawe umuhango n'Umwepiskopi Mukuru w'i Bujumbura wo kugirwa paruwase vuba, yoba iya Nkenga-Busoro

Inyuma y’imyaka itatu iheze batanguye umugambi wo kugura itongo muri karitiye Nkenga, umuryango w’abakristu ba Paruwase yitiriwe Bikira Mariya Umuvyeyi w’ikigongwe yo mu Kanyosha waragize urugendo rweranda ku wa Gatandatu igenekerezo rya 21 Ntwarante 2026, werekeza aho mu Nkenga aho waguze itongo ryo kwubakwamwo ingoro y’Imana.

Intumbero y’urwo rugendo yari iy’ukuja kwirabira iryo tongo baguze no kuhashinga Umusaraba, ikimenyetso co kuhegurira Umukama. Abo bakristu bari baje bavuye mu mibano rukristu yose no mu mihari n’imigwi y’ubutumwa itandukanye, abari mu butumwa butandukanye, abihebeye Imana n’abasaserdoti.

Urwo rugendo rwagizwe nk’uko vyari ku rutonde rw’ibikorwa vyaranguwe kuva ku musi wa kabiri igenekerezo rya 17 Ntwarante 2026 gushika ku w’Imana igenekerezo rya 22 Ntwarante 2026, indwi yari yahariwe kumenyesha Inkuru Nziza mu ntumbero yo guhimbaza umusi mukuru w’umuvunyi wa Paruwase Kanyosha «Bikira Mariya Umuvyeyi w’ikigongwe».

Urwo rugendo rwatanguye kw’isaha zibiri zo mu gitondo, inyuma y’igisabisho c’inkuka y’imisa yo mu gitondo. Abari muri urwo rugendo bagenda barasamiriza indirimbo zihayagiza Imana berekeza aho muri yo karitiye ya Nkenga.

Bashitse muri ico kibanza co mu Nkenga, batanguriye ku gisabisho co kuninahaza Imana, Patiri mukuru w’iyo Paruwase, Patiri Ferdinand Nduwimana, aca arashikiriza ijambo igihugu c’Imana cari aho, yongera arahezagira Umusaraba washinzwe muri ico kibanza, ikimenyesto co kuhegurirwa Imana.

Mw’ijamabo uwo musaseredoti yashikirije, yagarutse cane cane ku kugene ibikorwa vyo kurondera itongo aho muri iyo Karitiye vyatanguye, be n’ingingo yafashwe n’inama ntunganyabutumwa y’uko mu kiringo c’imyaka itatu (kuva mu mwaka w’2023), umugambi wa mbere na mbere worangurwa woba uwo guheza kugura itongo ryo mu Nkenga. Patiri Ferdinand ati: «Ng’uyu umusi urashe, ng’uyu umusi twari twiyumviriye, Imana irawuduhaye».

Uwo musaseredoti yaribukijje ko mu mwaka w’2023, abarongoye Paruwase, bari kumwe n’umuryango w’abakristu, bagiye inama ko mu migambi yose yorangurwa, uwa mbere woba uwo kugura itongo mu Nkenga.

Mbere yongerako ko mu kwezi kwa Ruheshi 2023, Umwepiskopi Mukuru wa Diyoseze Nkuru ya Bujumbura, mu nama yagirishije, mu bisata vy’amaparuwase vyahawe umuhango wo kugirwa paruwase vuba, harimwo na Nkenga-Busoro. Mbere amwe muri yo akaba ngo yaramaze kuvuka.

Patiri mukuru wa Paruwase Kanyosha yaboneyeho gushimira abitanze bose kuva uwo mugambi utangura ngo ico kibanza cababa are 53 kiboneke, baba abaterereye igisabisho n’abanze umwanya n’amafaranga. Akaba ngo yiteze ko ico kibanza kizokwubakwamwo iparuwase iteye igomwe izokwitwa Nkega-Busoro.

Yasozereye yibutsa ko iryo tongo ryaguzwe kw’ideni ry’ibanki, ari na co gituma hategekanijwe isekeza ryo kwegeranya uburyo rizoba ku musi mukuru wa Pasika yimirije ngo iryo deni ryishurwe, gutyo igice ca mbere c’uwo mugambi giherahezwe. Araheza agira ati: «Bakristu ba Paruwase Kanyosha nimukengurukire Imana kandi mwiruhutse.»

Bamwe mu bakristu bo muri Karitiye Nkenga bagize umubano rukristu witiriwe pasikari Mweranda usanzwe uri muri iyo karitiye baragaragaje ubukengurutsi. Abo ni nka Gahungu Gaspard na bagenzi biwe. Bagize bati: «Turishima kandi turishimirije kubona turonse iki kibanza; turaryohewe no kubona n’uyu Musaraba washinzwe uyu musi muri iki kibanza.»

Abo bakristu bakemeza ko abatama n’abatamakazi, eka mbere n’abava mu mitumba ihana urubibe na Nkenga, na bo nyene bagiye kworoherwa mu misi iri imbere, kuko ngo bazoba baronse aho basengera hafi. Bagashimira Imana cane ko umugambi Paruwase Kanyosha yari yihaye vyakunze ko iwushikako.

Twobamenyesha ko Karitiye Nkenga ari imwe mu zigize zone ya Kanyosha, ikaba ihana urubibe na Kajiji hamwe na Busoro, ikongera igahana urubibe na paruwase Kanyosha.

Iramaze gushinga vy’imfatakibanza isengero ntoyi muri karitiye Busoro, kandi abakristu baho baraharonkera inkuka y’imisa, kabiri mu ndwi, ku musi wa kane no ku musi w’Imana.

Ababa mu Nkenga umwizero ni mwishi, nk’uko umuntu ashobora kuvyumva bavyivugira, kuko ngo inyuma yo kugabana iryo tongo bizigiye kuzohora baharonkera n’inkuka y’imisa, n’aho batoba bararonka iparuwase. Bakaba bemeza mbere ko n’abantu boba bahora bagendera mu bintazi bagiye guhinduka, na rirya muri ico kibanza haraye hashinzwe Umusalaba.

Diomede Nyandwi, Paruwase Kanyosha  

Ivyiyumviro

Rondera

Urutonde rw'Imisa

Mwoba mufise ico mubaza?

Tanga