Ku musi w'Imana w'ibisandasanda, ku wa 29 Ntwarante 2026, abakristu ba paruwase Munanira, nk'abandi bakristu bose b’abakatolika kw'isi yose, bari baramutse bahimbaza idominika y’ibisandasanda, ni ukuvuga ukwigina Yezu Kristu yinjira icese i Yeruzalemu nk'Umwami n'umukiza, be n’iy’ukubabara n’ugupfa kwiwe.

Abo bakristu b’i Munanira barafashe ako karyo ngo basozera indwi y'urukundo mu gushikana ivyegeranijwe muri iyo ndwi ngo bicishishwe mu ngoro y’Imana, mu nkuka y’imisa ya kabiri, ngo bihezagirwe. Iyo nkuka y’imisa ikaba yaherejwe na Patiri Alfred Nintasha.

Uwurongoye igisata ca Caritas muri Paruwase Munanira, Viola Nduwimana, amenyesha ko uko iyo ndwi y’urukundo yatunganije, ko habaye inama ku baserukira ico gisata kuva mu mibano rukristu gushika ku rwego rwa paruwase, maze bagaheza bakegeraniriza iyo mfashanyo mu mibano, ico gikorwa ngo kikaba camaze indwi yose, baraheza babirungika ku mashure tabariro bakukira.

Mu vyegeranijwe harimwo ibiribwa bidashoka bibora, hamwe n'amafaranga, nk’uko bibandanya bimenyeshwa na Viola Nduwimana. Na ho ku kijanye n’ivyegeranijwe uko bingana, avuga ko bataraheza kubitororokanya, ariko ko nk'intete z'ibigori, batazobura nk’itoni nka zitatu.

Patiri mukuru wa Paruwase Munanira, Patiri Innocent Bandyatuyaga, yabanje kwibutsa ko indwi y'urukundo ari ikiringo Ekleziya iha abakristu ngo bashikane infashanyo yagenewe gufasha abagowe, ayo maturo akegeranywa, akarungikwa kwa papa biciye mu gisata ca Caritas.

Yabandanije amenyesha ko muri Paruwase Munanira, ico kiringo camaze indwi zibiri, aho ukristu wese yabatijwe yahawe ako karyo biciye mu mibano bitomito, mu mihari n'imigwi ndetse no ku mashure akukira Ekleziya Katolika.

Abakristu twagiye turaganira bavuga ko ata muntu afise umutima w'urukundo n'impuhwe yoreka  gufasha abagowe, mu gihe yoba afise n’ico yirengeje.

Ezéchiel Nimbona, Paruwase Munanira