Ku w’Imana igenekerezo rya 29 Ntwarante 2026, wari umusi w'Umukama w’ibisandasanda, ari wo musi w’ukubabara n’ugupfa kw’Umukama wacu Yezu Kristu. Mu guhimbaza uwo musi, Paruwase Katedrale Regina Mundi ikaba yari yatewe iteka n’Umwepiscopi Mukuru w’i Bujumbura, Nyenicubahiro Musenyeri Gerevazi Banshimiyubusa, yarongoye inkuka y’imisa yo kw’isaha zine, akikujwe n’abandi basaserdoti hamwe n’inshengero ry'abakritsu baje guhimbaza uwo musi.

Uwo Mwepiscopi Mukuru yahereye ku mugirwa wo guhezagira ibisandasanda imbere y’ingoro y’Imana, aca atumirira abari aho kwinjira bigana rya shengero ryari ryaje gutera impundu Yezu mu gufata urugendo mu mahoro, nk’uko vyari bihejeje gushikirizwa mu Nkuru Nziza ya Yezu Kristu yanditswe na Matayo (Mat.21,1-11) iherekeza uwo mugirwa.

Mu nsiguro y’Ijambo ry’Imana,  Musenyeri Gerevazi Banshimiyubusa yashimikiye ku Nkuru Nziza ya Matayo yerekana uguca bugufi kw’Umukama Yezu Kristu. Yavuze ko bibonekera ku ngene atashimye kwakirwa nk’abandi bami baza bicaye ku mafarasi, igitwazi c’abarwanyi cerekana umwami aje yitwaje ububasha bwo gutsinda abansi akoresheje inguvu n’igikenyi. Ariko We ngo yaje yiyicariye ku ndogobwe, igitwazi gitekanye, giciye bugufi, c’amahoro, kuko ngo yaje nk’Umusuku w’Imana, ata kindi yizigiye atari Imana Se.

Yavuze ati: «Yezu tubwirijwe kwitega no kwakira kw’ipasika si Yezu wo mu vyipfuzo, ni Yezu yashimye kutwiyereka, Umwami yitonda, w’urukundo n’amahoro; ni Umwami yemera no kubabara, ah’uko agira abo ababaza gushika n’aho yemera gupfa, ah’ukugira uwo yica canke yicisha. Niturondere kumwigana mu buzima bwacu ngo tuberwe kuba abana  b’ubwo Bwami, tuberwe no kuba abavukanyi ba Yezu.»

Yasavye abakristu ko mu ndwi nyeranda, muri ka kanya ko kuzirikana, boja barazirikana basubiramwo Inkuru Nziza ya Matayo ihera ku buhemu bwa Yuda igahereza kw’ihambwa rya Yezu, bazirikana uko abigishwa ba Yezu bavyifashemwo bikabananira no gufata agasaha kamwe gusa, baciye bisinzirira kandi bari bavuze ko bomupfira.

Yarongeye avuga ko iyo umuntu yatewe iteka ryo kuba hafi ya Yezu no kumugendanira nka Yuda, iyo amuteye akagere, cane cane akurikirana inyungu zitanashemeye, abura iyo aja n’iyo ava, kuko ngo yahemutse akikura ku Mana, agaheza akiyanka, akiyahura yibaza ngo yigiriye neza, mugabo agasanga yigiriye nabi.

Yashimangiye akebura abantu usanga bemera Imana hanyuma bakayihakana, ababwira ko batigaruye hakiri kare bahakwa kuzoheza ubuzima bwabo nka Yuda. Ati: «Ariko ntimukamere nka Yuda mufise abahanuzi; nimwigarure, musubire ku Mana, ni Munyakigongwe, irabakira mwese; ntihagire uwihebura».

Umwepiskopi Mukuru, yisunze Inkuru Nziza ya Matayo nyene, yarerekanye kandi ubube gito bwa Pilato n’ububi bw’igicumuro yakoze co kwicisha Yezu kandi ari intungane: gukora ikintu nkana. Ku bw’uwo Mwepiskopi Mukuru, iyo abantu badashingiye ku kuri, ubutumgane n’urukundo, ngo usanga bava mu buja bumwe bakaja mu bundi, nk’uko biri mu ntwaro zo kw’isi.

Na ho abafise amabanga bajejwe mu gihugu bagashinga ingingo ziciye kubiri n’ukuri, n’ubutungane, n’umwidegemvyo w’abantu, be n’abafata ingingo ziciye kubiri n’urukundo, uwo Mwepiskopi Mukuru yavuze ko baba biteye kuzoba iciro ry’umugani, nk’ukwo kwa Pilato.

Musenyeri Gerevazi Banshimiyubusa akaba yatumiriye abakristu gusaba inema n’ubutwari vyo guheba ikibi, ntibabe nka Yuda yahemutse canke nka Pilato yakoze ubube gito, canke nk’ishengero ryaranzwe no kuba mahindagu mu kwemera. Uwo mwepiscopi yasozereye asabira abakristu bose ngo Imana ibakize akabi kajana abandi ku musalaba ku bw’ukubabara n’ugupfa kwa Yezu Kristu Mukiza.

Dora Simbare, Paruwase Katedrale Regina Mundi