Musenyeri Gerevazi Banshimiyubusa yibukije ko atari umusi w'ikirori, ahubwo ko wama ari umusi uhambaye muri Ekleziya, haba ku bw'ibimenyetso biwuranga be n'ukuzirikana kw’ijambo ry’Imana riwurongora

Kuri uyu wa Gatatu wo mu ndwi nyeranda muri uyu mwaka w’2026, igenekerezo rya 01 Ndamukiza, ni umusi muri Ekleziya yo muri Diyoseze Nkuru ya Bujumbura bimenyerewe ko harangurwa imigirwa nyeranda y’ihezagirwa ry’amavuta meranda ya Krisma n'ayandi mavuta yose akoreshwa mu migirwa y’Ekleziya.

Kabaye kandi n'akaryo ko gusubiramwo indagano z'ubusaserdoti busuku ku basaserdoti bose ba Diyoseze n'abaharangurira ubutumwa, mu nkuka y’imisa yabereye muri Paruwase mvyeyi ya Diyoseze, Paruwase Katedrale Regina Mundi. Iyo Diyoseze yari yatewe iteka n’umuhagarikizi wa Papa mu Burundi, Nyenicubahiro Musenyeri Dieudonné Datonou, ari kumwe n'umunyamabanga w'ubwo buserukizi.

Umwepiskopi Mukuru w’i Bujumbura yakeje yongera aratera intege abo basangiye ibanga ry’ubusaserdoti busuku bose, yongera abasaba kubandanya bitura Imana ngo ibateze imbere mu gukunda ibanga ryabo. 

Mu basaserdoti yakeje harimwo abamaze gukwiza imyaka 60 mw'ibanga ry'ubusaserdoti, vy'umwihariko Umwepiskopi Mukuru w’inararibonye, Nyenicubahiro Musenyeri Evariste Ngoyagoye, kumwe na Patiri Adriyano Ntabona batiriwe rimwe, be n'uwundi yimirije guhimbaza na we iyo myaka muri uku kwezi nyene dutanguye, Patiri Pierre Sahabo.

Mu gufasha abari aho kuzirikana kw’ibanga ry’ubusaserdoti busuku, Musenyeri Gerevazi Banshimiyubusa yibukije ko mu kwigina ubwo busaserdoti, abasaserdoti bahimbarwa ko Kristu yashimye kububasangiza na We, bamwe bose ku rugero rwabo no ku muhamagaro wabo, kandi ko ari n’akaryo ko gukengurukira Imana ku basaserdoti basuku ibandanya itorera igihugu cayo.

Yanibukije kandi ko atari umusi w'ikirori, ahubwo ko wama ari umusi uhambaye muri Ekleziya, haba ku bw'ibimenyetso biwuranga be n'ukuzirikana kw’ijambo ry’Imana riwurongora.

Mu gihe hari abasaserdoti bakejwe vy'umwihariko ku myaka bamaze muri iryo banga, mwomenya ko hibutswe kandi vy'umwihariko n’umusaserdoti mugenzi wabo yaheruka kubakurwamwo yitavye Umuremyi, umuhisi Patiri Amando Kana, yitavye Imana kw'igenekerezo rya 30 Nzero 2026.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga