Uwo Mwungere w’Ekleziya kw’isi amenyesha ko yifatanije mu kababaro no mu gisabisho n’iyo miryango, agasabira abahitanywe n’iryo sanganya ngo baruhukire mu mahoro mu Mukama, abakomeretse na bo ngo bareme, kandi umuco w’umwizero ubarasireko

Nyenubweranda Papa Léon-XIV, ku wa gatandatu mweranda igenekerezo rya 4 Ndamukiza 2026, yararungikiye Ekleziya y’i Bujumura ubutumwa bwo guhoza abakozweko n’isanganya ryashikiye ububiko bw’ibisasu bwo mw’ikambi y’abasirikare yo ku Musaga i Bujumbura buheruka gusha, ivyo bisasu bigaturika bigahitana ubuzima bw’abantu n’ibintu, abandi bagakomereka.

Uwo Mwungere w’Ekleziya kw’isi yarungikiye Ekleziya y’i Bujumura ubwo butumwa inyuma y’aho amenyesherejwe n’ubuserukizi bwiwe ivyashikiye Uburundi vy’iturika ry’ivyo bisasu vyari mu bubiko muri iyo kambi ya gisirikare.

Nyenubweranda Papa yaciye yihuta kurungikira ubwo butumwa Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, ubutumwa bwanditswe n’Umunyamabanga wa Leta y’i Vatikano, Cardinal Pietro Parolin, bugashikirizwa Ekleziya y’i Bujumbura buciye ku buserukizi bwa Papa mu Burundi.

Muri ubwo butumwa bugufi bwasomwe n’uwo Mwepiskopi Mukuru w’i Bujumbura mu giteramo ca Pasika cariko kirabera kuri Katédrale Regina Mundi, Umwungere w’Ekleziya kw’isi yarahojeje imiryango  yakozweko n’iryo sanganya, yongera aramenyesha ukwifatanya mu kababaro no mu gisabisho n’iyo miryango.

Nyenubweranda Papa yamenyesheje ko asabira abahitanywe n’iryo sanganya ngo baruhukire mu mahoro mu Mukama, abakomeretse na bo bareme, kandi umuco w’umwizero ubarasireko.

Ubukandizi bwiwe akaba yarabucishije ku Muvyeyi Bikira Mariya ngo abasabire ku Mwana wiwe Kristu yazutse, akomeze kandi ahumurize abo bose bakozweko n’iryo sanganya, kandi imihezagiro ya Mana Data ibashungurukireko.

Tubibutse ko iryo sanganya ryabaye ku mugoroba usozera ukwezi kwa gatatu, ku wa kabiri igenekerezo rya 31 Ntwarante 2026, ugahitana ubuzima bw’abantu n’ibintu vyononekaye.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga