Abo babatijwe bashitse mu za bukuru hari igihe vyashika bakigishirizwa imuhira, kubera amagara make, ariko mu gihe co guhabwa ibice biganisha kw’isakramentu ry’ibatisimu, barigora bagashika kw’iparuwase (Mwarimu Zacharie Nimbona)

Mw’ijoro rya Pasika ku wa gatandatu mweranda igenekerezo rya 4 Ndamukiza 2026, aho muri Ekleziya hasozerwa igihe gihambaye c’imisi itatu y’uguhimbaza amabanga y’icungurwa ry’abantu «Tridium Pascal», umwe mu migirwa yaranguwe muri Paruwase Munanira ni ibatisimu y’abakuze, akatekumeni, icibonekeje kikaba ari uko mu bakiriye urukiza rw’Imana muri iryo joro harimwo n’abatama barenza imyaka 75 bipfuje guzosezera ubuzima bwo ngaha kw’isi ari abakristu.

Mu masakaramentu yatanzwe muri iryo joro harimwo ibatisimu ku bakatekumeni barenga ijana na mirongo ibiri, uwundi mugwi w'abakristu urakirwa icese, abari barahagaritse amasakramentu, abandi burubaka rukristu. Mu bakiriwe harimwo kandi n'ababavuye mu yandi madini, ariko ibatisimu yabo isanzwe yemewe na Ekleziya Katolika.

Muri abo bakiriwe harimwo n’abaciye bakomezwa muri Mutima Mweranda, Patiri mukuru wa paruwase, Patiri Innocent Bandyatuyaga, akaba amenyesha ko yabisabiye uruhusha ku Mwepisikopi Mukuru wa Diyoseze iyo Paruwase ikukira, Diyoseze Nkuru ya Bujumbura.

Abo babatijwe bashitse mu za bukuru ngo hari igihe vyashika bakigishirizwa imuhira, kubera amagara make, bagaheza bagahabwa inyigisho zijanye n'isakramentu bari bimirije kuronka, nk’uko twabishikirijwe n’Umuyobozi w'inyigisho nkomezakwemera n'amasabamana muri Paruwase Munanira, Mwarimu Zacharie Nimbona, bikemezwa na patiri mukuru wa paruwase. Ariko mu gihe co guhabwa ibice biganisha kw’isakramentu ry’ibatisimu, ngo barigora bagashika kw’iparuwase.

Patiri mukuru arashimira abarongoye imibano n'abakurikiranye iyo migwi yose. Arashimira kandi n'abo bahawe amasakaramentu ku kuntu bitanze mu gukurikirana inyigisho n'ibindi bikorwa vy'iterambere rya paruwase bahamagariwe, kuko ngo ha ruhande y'inyigisho ndoramana bahawe, bafashije no mubikorwa vyo mu mirima vyunganira paruwase.

Patiri Innocent Bandyatuyaga akaba amenyesha ko nihagera gusarura azobatumako n’ubundi, nk’uko biri no mu civugo ca Diyoseze c'uyu mwaka, ngo «Dukomeze Ekleziya muryango mu kugira ubumwe n'urukundo no mu gusangira neza ivyo Imana iduha!»

Tubamenyeshe ko muri Paruwase Munanira, imigirwa yo gusozera ico gihe c’imisi itatu y’uguhimbaza amabanga y’icungurwa ry’abantu «Tridium Pascal» yabereye ku kirimba ca paruwase hamwe no kw’ishure tabariro rya Kirehe, ariko abahabwa amasakramentu bose bakaba bahuriye kw’iparuwase, turetse abahabwa ibatisimu gusa bo kw’ishure rya Kirehe, bayironkeye aho iwabo.

Ezéchiel Nimbona, Paruwase Munanira

Ivyiyumviro

Rondera

Urutonde rw'Imisa

Mwoba mufise ico mubaza?

Tanga