
«Imibano
mito mito ihamagarirwa kuba icitegererezo mu kibano eka no mu buzima bwa misi
yose», ayo ni amwe mu majambo yashikirijwe ku w’Imana igenekerezo rya 10 Rusama
2026, aho imibano yo muri Paruwase yitiriwe Umweranda Guido Maria Conforti yo
mu Kamenge yari iramutse ikengurukira Imana ku mwaka uheze irangura ubutumwa.
Uwo
musi mukuru w’imibano rukristu muri Paruwase Kamenge watangujwe n’inkuka
y’imisa ya kane yatanguye ku gihe c’isaha zitanu irongowe na Patiri mukuru
w’iyo Paruwase, Patiri Philbert Ntahimpera, aho yabwiye umuryango w’abakristu
wari aho ukuntu imibano rukristu ari ingirakamaro mu buzima bw’abakristu: yamenyesheje
abari aho ko imibano itajamwo abatama n’abatamakazi gusa, ahubwo ko ari zina
muntu wese, hadasizwe inyuma abana canke urwaruka.

Mu
mwanya wo gukenguruka mu misa, abo bari mu mibano rukristu barashimiye Imana
cane ku vyiza yabakoreye. Agasangwa bari baje muri iyo nkuka y’imisa bitwaje
ibiseke, baciye bashikana mu kanyamuneza ntangere ivyo bari bitwaje.
Inkuka
y’imisa irangiye baciye babandanyiriza umusi mukuru mu nyubakwa y’akarorero
y’iyo Paruwase, ngo biginane. Abagiye baravuga amajambo bose, baba abatumire,
eka mbere na Patiri mukuru, barabakeje ku ntambwe baguma batera mu mibano
rukristu.

Patiri
mukuru yasavye abari aho ko bobandanya bitanga kandi batunganyiriza ababitura. Abarongoye
iyo mibano akaba yabasavye ko ku mwaka uza, uwo musi bowutegura ku buryo wohimbarizwa
kw’ishure tabariro bazoba biyumviriye, kugira ngo ubumwe bubandanye
butsimbatara muri paruwase.
Yaboneyeho
kumenyesha ko inyuma y’umusi mukuru wa Pentekoti, abasaserdoti bagize umubano
wo mu Kamenge bazoca basubira kuja baragendera imibano aho isanzwe ikorera,
bongere bahaherereze inkuka y’imisa.
Pierre
Nduwayezu, Paruwase Kamenge
Aleluya, aleluya.
Yeruzalemu, igine Umukama,
ni we arungikira isi ijambo ryiwe.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (17, 11-19)
Muri irya misi, Yezu yariko aragenda i Yeruzalemu, aca ku rubibe rwa Samariya n’Ubugalile. Ariko araca mu mihana yaho, hakaba abantu cumi barwaye imibembe baza bagana iyo yari ari. Bashira ijwi hejuru bakiri kure, bati: «Yezu, Mwigisha, tugirire ikigongwe!» Na we ngo ababone, arababwira ati: Nimugende mwiyereke abaherezankuka.»  Na bo bashitse mu nzira, babona bakize.
Umwe muri bo rero ngo abone yakize, aca asubira inyuma, aza arishongora aninahaza Imana; ashitse imbere ya Yezu; akubita ibipfukamiro hasi amukurira ubwatsi. Kandi uno yari Umunyasamariya. Yezu rero arabaza ati: «Mbega, ntibakize bose uko bari icumi? Nta wundi yoboneka ngo agaruke aninahaze Imana, atari uwo munyankiko! Araheza amubarira ati: «Va hasi, ugende; ukwemera kwawe kuragukijije.»