Ku w’Imana igenekerezo rya 7 Ruheshi 2026, abakristu bo muri Paruwase Katedrale Regina Mundi bahimbaje umusi mukuru w’Isakramentu ryeranda bari kumwe n’Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, ari na we yareruye Isakramentu ryeranda mu rugendo.

Uwo musi mukuru waranzwe n’urugendo rweranda. Abakristu harimwo abihebeye Imana, abari mu ntwaro y’igihugu, abanyamihari, abaririmbiramana, abana co kimwe n’abakuze bahuriye imbere y’isengero Katedrale Regina Mundi, bakikuza Umwepiskopi Mukuru wa Diyoseze  Nkuru ya Bujumbura. Urwo rugendo rwatanguye inyuma y’inkuka ya misa yatanguye kw’isaha zine irongowe n’Umwepiskopi Mukuru wa Diyoseze.

Urwo rugendo rwaciye mu bibanza bitandukanye, aho abakristu bagiye barashikiriza ibisabisho bitandukanye, basabira Ekleziya, igihugu, imihamagaro, abamenyeshamakuru, imiryango, abarwaye, ubutunzi n’ibindi bisata vy’ubuzima. Hagati y’igisabisho n’ikindi, bagenda baraninahaza Yezu Kristu Umwami w’abami avyagiye muri iryo sakramentu ryeranda, bamutambira, bamuririmbira, bamuvugiriza n’ingoma, bamuvugiriza impundu.

Musenyeri Gerevazi Banshimiyubusa yamenyesheje ko uwo musi ari akaryo ko guhimbarwa kuri uwo wese yamaze kwemera ko Yezu ari we Mwami wiwe, ako kanyamuneza kakarushiriza ku bamaze kugaragaza ukwo kwemera bati «Umwami wanje ni wewe Yezu, nzogusenga imisi yose, untabare ngukorere neza, urupfu ruze rusange nkiri umwana wawe». Ngo ni akaryo kandi ku bakristu b’abakatorika ko kugaragaza ukwemera kwabo, mbere bagatuma n’abandi bemera Kristu, bakamuyoboka.

Yatumiriye abakristu gusabiranira kugira ngo bashobore kugendera ivyo biyemeje, mbere batume n’abandi bamwemera, bamuyoboka. Yasavye abakristu ko urwo rugendo rwoba akaryo ko kugaragaza ukwemera kwabo ko baherekeje umwami wabo ngo agendere igihugu ciwe mu mpande zose.

Yavuze atiꓽ «Na none Umwami aragendanirwa; tumugendanire, agendere igihugu ciwe, ace muri za ngo n’imibano yacu ahahezagire, ace mu makaritiye no mu mitumba yose ahahezagire, aduhezagire, ace no mu bataramumenya no mu batamunezwe, abimenyeshe na bo, gutyo adufashe kubana twese mu bumwe n’urukundo, dufashijwe n’iryo sakramentu ry’urukundo tujabuke tuva mu buja bw’ikibi tuja mu buzima bw’urukundo n’amahoro bibereye kandi biranga abana b’Imana». 

Ange Bernice Ingabire, umwe mu bakristu bari mu rugendo, yamenyesheje ko uwo musi mukuru w’Isakramentu ryeranda wamubereye akaryo keza ko kugendanira Yezu muzima muri iryo sakramentu, agenda aramuhereza ivy’aho bagiye baraca hose. Yatumiriye urundi rwaruka guhurumbira amasakramentu na cane cane Ukaristiya.

Grâce Divine Gahimbare, Paruwase Katedrale Regina Mundi