Musenyeri Gerevazi Banshimiyubusa yarashimye ko igiteramo nk'ico, mu bisanzwe cobaye ic’ukuryoherwa, cabaye riho ic'ugufasha mu buryo bw'indirimbo mu mugambi «Uguruka ukire» w'igisata ca Diyoseze c'ubutungane n’amahoro (CDJP-Bujumbura), ngo abantu bashobore kurengana kahise kabi kama kabazingira aho bari, batambuke riho baja muri kazoza keza

Umugwi w’abaririmbiramana witiriwe «Regina Caeli» wo muri Paruwase Kanyosha, wifatikanije n’igisata ca Diyoseze Nkuru ya Bujumbura kijejwe ubutungane n’amahoro (CDJP-Bujumbura), baratunganije igiteramo cagutse citiriwe «Uguruka ukire» (Festival Uguruka ukire) ku civugo kigira kiti: «Indirimbo z’Imana mu gikorwa co kunywanisha abantu». Ico giteramo kikaba caremeshejwe ku mugoroba wo ku musi w’Imana igenekerezo rya 6 Nyakanga 2026, mu kigo ca paruwase Katedrale Regina Mundi.

Umugwi «Regina Caeli» ntiwaremesheje ico giteramo wonyene, wari waratumiye n’iyindi migwi y’abaririmbiramana yo mu maparuwase atandukanye yo mu maparuwase yo mu gisagara ca Bujumbura, aha tukaba twovuga uwitiriwe umweranda Visenti wa Paulo (Saint Vincent de Paul) wo mu Nyakabiga, be n’abaririmbiramana b’izuka (Chœur de la résurrection) bo mu kigo c’urwaruka co mu Kamenge (Centre jeunes Kamenge). Iyindi mugwi yafashije mu kuremesha ico giteramo ni umugwi ndangakaranga Abagenderabuntu be n’ishirahamwe Abasuku bagenzi ba Yezu (ASAJ).

Abo bose bakaba barateramishije abari aho mu ndirimbo, intambo n’ivyese birimwo ubutumwa bwerekeye amahoro, urukundo, ukuvugana ukuri, ugusubiza hamwe n’ukurekuriranira. Ibindi vyari muri ico giteramo wari umurisho w’ingoma nʼivyese. Eka vyose vyaranguka mu rweze, umuntu abona nyene ko bihimbaye ijisho nʼugutwi.

Ntibatamvye birorera, kuko ico giteramo cari citabwe n’abantu isinzi, harimwo n’abatumire b’iteka, guhera ku Mwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, kumwe n’Umwepiskopi Mukuru w’inararibonye w’i Bujumbura nyene, Nyenicubahiro Musenyeri Evariste Ngoyagoye, n’icariho gikuru cUmwepiskopi Mukuru, Musenyeri Anatole Ruberinyange.

Abandi batumire bitabiriye ico giteramo ni Patiri mukuru w’iparuwase cabereyemwo, Patiri Félix Fupi, be n’Umunyamabanga w’igisata ca Diyoseze c’ubutungane n’amahoro cafatikanije n’abo baririmbiramana b’umugwi «Regina Caeli» wari ugorobeje uremesha ico giteramo, Patiri Anicet Shumbusho, n’abandi basaserdoti batari bake bagwiriyemwo abo muri paruwase Kanyosha, kumwe n’abihebeye Imana, n’abakristu balayike isinzi bari bahishikiye. Mu ntwaro hari haje uwaserukiye Musitanteri wa komine Mukaza, umupfasoni Sylvane Bavumiragiye, ajejwe igisata cʼintwaro muri komine.

Abaririmbiramana b’uwo mugwi «Regina Caeli», mu mwambaro mwiza, bashajije, ni bo buguruye ico giteramo, ku ndirimbo «Amahoro Umukama aduhaye». Uwo mugwi waragaragaje ubuhinga ufise mu kuririmba indirimbo zinywanisha abarundi. Aha twovuga nk’indirimbo «Dutsimbataze ubumwe», «Nk’uko twese turi bamwe», «Rwanya amacakubiri», «Funiculi», n’izindi.

Ugutunganya ico giteramo vyavuye ku mugambi wagutse «Uguruka ukire» wa Diyoseze Nkuru ya Bujumbura uriko uraranguka mu maparuwase yose agize Diyoseze, nk’uko vyashikirijwe n’uwuyoboye uwo mugwi «Regina Caeli» w’abaririmbiramana bo mu Kanyosha, Dr Moïse Habonimana.

Uwo ayoboye uwo mugwi akaba yamenyesheje ko abo baririmbiramana, aho bumviye iciyumviro c’Umwepiskopi Mukuru, baciye bumva ko bogira ico bakoze mu guterera umuganda muri ubwo butumwa bwo kwubaka imitima yʼabakristu n’abene Burundi bose, ku bwiwe abona ko ari «ubutumwa ngirakamaro ngo abarundi bashobore gukira ibikomere bagiye baracamwo», ni kwo yavuze.

Dr Moïse Habonimana akaba ngo yiteze ko ubutumwa bwʼurukundo nʼamahoro, bw’ubumwe n’ikigongwe no gusubiza hamwe, bwoshika ku mitima y’abari ngaho. Akaba yasavye abari muri ico giteramo ko ubwo butumwa bobutahana, bugasasagara mu kibano iwabo. 

Yaravuze kandi ko ku kamaro ko kwumviriza ubutumwa nk’ubwo: ngo burashika ku mitima y’abantu rwose, bukayorosha, gutyo bakabona kwuguruka, bakayaga ivyo babitse kuva kera na rindi kandi bagendana imyaka myinshi, bigaheza bigatuma barekura, bagakira burundu.

Yarasavye ko amajambo bumvise boyagira rwabo, bakayajana aho babaye, kandi ngo bakayayaga aho baca hose. Erega ngo arashobora kubera ikiraro abatari bake.

Yarangije ashimira Diyoseze Nkuru ya Bujumbura ko yemeye ko iciyumviro cabo kija mu ngiro, kandi ikabaterera ivyiyumviro ngo gikunde. Uwundi yakengurukiye ni Patiri mukuru wa Paruwase Kanyosha, kuko na we ngo yabahaye uruhusha rwo gutunganya neza ico giteramo, mbere akanabemerera ko bogikorera mu yindi paruwase.

Yarashimiye kandi na patiri mukuru wa Paruwase Katedrale Regina Mundi ko yemeye ko igiteramo kibera muri paruwase arongoye. Abandi yakengurukiye ni ababafashije kuremesha ico giteramo, aho yamenyesheje ko mu kubatora bisunze ababaye aba mbere nʼaba kabiri mu giteramo «Tereza Mwiza» caheruka.

Uwaserukiye Musitanteri wa komine Mukaza, umupfasoni Sylvane Bavumiragiye, yasavye abitavye ico giteramo gutahana ubutumwa bwʼamahoro bumvise mu ndirimbo, ariko na cane cane bakayatsimbataza mu mitima yabo, bakayatwara mu rugo batahamwo, mu kibano, mbere no ku mirimo ya misi yose. Ngo bayatahanye, uburundi bwokira. Akaba yarateye intege uwo mugwi awusaba ko ico gikorwa bogikorera no mu yandi ma komine.

Nyenicubahiro Musenyeri Gerevazi Banshimiyubusa yarashimiye cane uwo mugwi wagize iciyumviro ciza, uraheza uragishira mu ngiro ubanje kumucako, aho na we yaheza akabarungika mu gisata c’ubutungane n’amahoro ca Diyoseze.

Yarabakengurukiye kandi ko barondeye abandi bofashanya kubateramisha. Ku bwiwe ngo bigaragaza ubumwe bafitaniye n’iyindi migwi. Yarakengurukiye kandi abari  mu gisata c’ubutungane n’amahoro ko baherekeje uwo mugwi ngo igiteramo mu bisanzwe cobaye ic’ukuryoherwa kibe riho igifasha gutanga mu bundi buryo inyigisho basanzwe batanga muri uno mwaka, inyigisho zibasaba kwuguruka kugira ngo bakire.

Yavuze ko ukwuguruka gutuma bakira ari ukwuguruka bugurukira uwundi mu kuri, biteguriye kumusaba imbabazi canke kumuha imbabazi, kugira ngo bashobore kurengana kahise kabi kama kariko karabazingira aho bari, gutyo bashobore gutambuka bashingura baja muri kazoza keza, kuko baba biganye Imana yama iriko irabarekurira, n’iyo bakoze ibikosa binini binini.

Mwomenyako igiteramo «Uguruka ukire» kije inyuma y’inyigisho nyinshi zatanzwe muri Diyoseze mu mugambi «Uguruka ukire». Patiri Anicet Shumbusho, ahagarariye igisata c’ubutumwa bw’ubutungane n’amahoro muri Diyoseze Nkuru ya Bujumbura akaba atumirira n’abandi bose bafise ingabirano zitandukanye bipfuza guterera muri uwo mugambi kugira ico bakoze. Mu gisata CDJP-Bujumbura ngo bakaba biteguriye kuzobashigikira. 

Odrade Kaze, CEDICOM

Ivyiyumviro

Rondera

Urutonde rw'Imisa