Jacques Nivyabandi arongoye uwo mugwi yasavye abavyeyi b'abaronkejwe ivyo bikoresho kubikenguruka uko bingana kwose; abana na bo barahimbawe cane kuko bazoja kw’ishure bafise ibikoresho; bakaba basabira imihezagiro uwo mugwi wa Carits w'iyo Paruwase

Umugwi w’ubutumwa bwa Caritas wo muri paruwase Katedrale Regina Mundi, mu ntumbero yo gusahiriza abana bo muri iyo paruwase bo mu miryango y'amikoro make biga ngo baje barakurikirana ivyigwa neza mu mwaka w’ishure utanguye w’2026-2027, waratanze ibikoresho vy’ishure bana bangana 60, ico gikorwa kikaba caranguwe ku musi wa kabiri igenekerezo rya 8 Nyakanga 2026, gihagarariwe na Patiri Janvier Nizigiyimana yaserukiye Patiri mukuru wa Paruwase.

Ibikoresho vyafashishijwe abo bana ni amakaye, amakaramu, ibikoresho vyo guca imirongo n'ivy'ugucapa, nʼabandi baronkejwe amasakoshi batwaramwo ivyo bikoresho. Jacques Nivyabandi arongoye uwo mugwi akaba yasavye abavyeyi b'abo baronse ivyo bikoresho kubikenguruka uko bingana kwose, badakwije na ho bakarondera ukundi kuntu bokwongerereza.

Abavyeyi b’abo bana barakengurutse cane ko babafashirije abana. Umwe yagize bati: «Turashima cane ko mudufashiriza abana; ni ukuri vyangogoye cane; muhezagirwe». Uwundi yagize ati: «jewe ndanezerewe kandi ndashima Imana yatwiyumviriyeko; nta mikoro mazima twari dufise, ariko twabonye umuryango wa Ekleziya utwiyumvirako».

Abana na bo barahimbawe kuko bazoja kw’ishure bafise ibikoresho. Abo bana basabira imihezagiro umugwi Carits wa Paruwase. Umwe yagize ati: «Numva akanyamuneza kadasanzwe.» Akaba yariyemeje ko agiye kuzoshiramwo inguvu. Uwundi na we ati: «Sinoronka ukugene ndabashimira ku bw’iteka muduteye; shimire aba babiduhaye; Imana ibahezagire, baronke imigisha myinshi».

Mwomenya ko ico gikorwa cama gikorwa uko umwaka utashe, nk'uko bimenyeshwa n'uwo arongoye umugwi wa caritas muri Paruwase Katedrale Regina Mundi, avuga ko uwo mugwi wama witaho abana b’abanyeshure mu kubaronsa ibikoresho vy’ishure bimwe bimwe baba bakeneye.

Aline Mpawenayo, CEDICOM

Ivyiyumviro

Rondera

Urutonde rw'Imisa