Amashure tugarukako ni aya Kanyosha-I, Kanyosha-III na Galila, abayobozi b’ayo mashure bakaba bavuga ko umwaka w'ishure bawutanguye neza kuko habaye imyiteguro ikwiye mu gusiga amarangi ku bibaho no mu gutunganya amanama n'abigisha; ibibazo nyamukuru na vyo bikaba ari ubukene bw'ibitabu mfashanyigisho be n'ubw'abigisha b'abakutsakivi

Nk'uko amashure yose yo mu gihugu c'Uburundi yatangura umwaka w'ishure w'2026-2027, kuri uyu wa mbere igenekerezo rya 14 nyakanga 2026, amwe mu mashure yo muri zone Kanyosha muri komine Mugere twasanze igisata c'amakuru ca Paruwase Kanyosha cagendeye, na yo nyene yatanguye umwaka w’ishure, aha twovuga nko kw'ishure ry'abigenga Galila, ishure nshingiro rya Kanyosha-III rikukira Ekleziya Katolika, hamwe no kw'ishure nshingiro rya Kanyosha-I.

Twaregereye abayobozi b’ayo mashure, baraheza baratwiganira uko batanguye umwaka w'ishure. Arthémon Niyongendako, Umuyobozi w'ishure Galila, amenyesha ko umwaka w'ishure bawutanguye neza, kandi ko akamo umushikiranganji w'indero yateye abavyeyi, abayobozi b'indero, abanyeshure n'abigisha, bakitabiriye ku rugero rushimishije. Agahamagarira abanyeshure gukwirikiza impanuro bahabwa n'ubuyobozi ndetse n'abigisha baba bariko barabigisha.

N’Umuyobozi w’ishure nshingiro rya Kanyosha-III rikukira Ekleziya Katolika, Eugène Ngomirakiza, na we nyene amenyesha ko umwaka w'ishure bawiteguriye neza nko mu gusiga ibibaho, gukoresha intebe, gusanura amashure yari yarononekaye, ndetse no kugiriranira inama n'abigisha mu ntumbero yo kwitegurira neza umwaka w'ishure.

Ariko n'aho biri ukwo, ngo barafise ikibazo c'ubukene bw'ibitabu mfashanyigisho vyo mu mwaka w'umunani no mu mwaka w’icenda, hamwe n'ubukene bw'abigisha b'abakutsakivi.

Eka n’Umuyobozi w'ishure shingiro rya Kanyosha-I, Egide Nshimirimana, amenyesha ko umwaka w'ishure watanguye neza. Ku musi wo gutangura umwaka w’ishure, abigisha barezi ngo bari batonze ku rugero rushimishije. Mbere n'abanyeshure bari bitavye akamo batewe n'Umushikiranganji w'indero.

Yarongeye amenyesha ko umwaka w'ishure bawutanguranye ubukene bw'intebe hamwe n’ubw'ibitabu mu mashure y'igice ca kane c'ishure shingiro. Akaba yahamagariye abanyeshure gukurikirana ivyigwa, biteho kuzinduka ku mashure. Abigisha barezi na bo abasaba kuguma hafi y'abanyeshure ngo babatere intege.

Tubamenyeshe ko umwaka w'ishure w'2026-2027 wuguruwe icese n'Umushikaranganji w'indero François Havyarimana, akaba yawugururiye kw'ishure CFP Bisinde riri muri komine Butangazwa, mu ntara ya Buhumuza.

Stany Ndayishimiye, Paruwase Kanyosha

Ivyiyumviro

Rondera

Urutonde rw'Imisa