Uwo mwaka w’ubutumwa wuguruwe ku civugo kigira kiti: «Dukomeze Ekleziya-muryango mu kugira isangiramutima, no mu kuronderera hamwe iterambere runtu, ryuzuye kandi ryibuka abandi», hakaba ari no muri iyo ntumbero nyene umugambi washizwe imbere ari uwa Kaminuza Katolika uzotanguzwa vuha ngaha i Bujumbura

Umwaka mushasha w'ubutumwa waruguruwe icese muri Diyoseze Nkuru ya Bujumbura, uw'2026 ushira uw’2027. Wuguruwe ku wa gatandatu igenekerezo rya 19 Nyakanga 2026, kuri Paruwase mvyeyi ya Diyoseze, Katedrale Regina Mundi, ubwahuro bukaba bwatanzwe n’Umwepiskopi mukuru w'iyo Diyoseze, Nyenicubahiro Musenyeri Gerevazi Banshimiyubusa. Kabaye n’akaryo ko guhimbaza isabukuru yʼimyaka 26 Musenyeri Gerevazi Banshimiyubusa amaze yatiwe mw'ibanga ry'ubwepiskopi.

Ivyo birori vyari vyitabiriwe n’abanyamuryango wa Diyoseze isinzi baje baserukira abandi mu mibano y’abasaserdoti, iy’abihebeye Imana be n’abalayike bafise ubutumwa mu maparuwase no mu bisata bitandukanye vy’ubutumwa bwa Diyoseze. Vyari vyatewe iteka kandi n’indongozi mu buzima bw’igihugu c’Uburundi ku nzego zo hejuru, harimwo icegera c’Umukuru w’igihugu, Prosper Bazombanza, ari kumwe n’umutambukanyi wiwe. Eka hariho n’amashengero yari yateye iteka ivyo birori, nk’ishengero rya Anglikani ryari ryaserukiwe ku rwego rwa Diyoseze Nkuru yaryo ya Bujumbura.

Umwepiskopi Mukuru w’i Bujumbura yamenyesheje ko uwu mwaka w’ubutumwa yuguruye ari umwaka udasanzwe mu ndinganizo y’ubutumwa bwa Diyoseze Nkuru ya Bujumbura, kuko ari umwaka usozera urugendo rw’imyaka itanu Diyoseze imaze abanyamuryango bayo barangura ubutumwa babanje kuburinganiza mu ndinganizo yitwa «Plan quinquennal» yo kuburangura bisunze intumbero nkuru ya Diyoseze yabo, ivyo umwo Mwepiskopi ashima cane.

Musenyeri Gerevazi Banshimiyubusa yabanje kwibutsa ivyivugo vyagiye biraranga iyindi myaka iheze, bishingiye ku kwubaka Ekleziya muryango, hanyuma ku kuyikomeza mu buryo butandukanye, maze umukristu wese akumva ko afise ikibanza n’uruhara muri Ekleziya-muryango irangwa n’isangirangendo n’ugusangira ubutumwa. Yabandanije amenyesha ko uburyo bw’ugukomeza Ekleziya-muryango muri uyu mwaka ari mu kuronderera hamwe iterambere runtu, ryuzuye, kandi atawe ryibagira.

Ni no muri iyo ntumbero nyene yo kuronderera hamwe iterambere ryuzuye, uwo Mwepiskopi Mukuru yavuze ko hariho n'umugambi uja warashizwe imbere na Diyoseze, uwo na wo ukaba ari uwa Kaminuza Katolika y’Uburundi. Kukaba nka kwo, mu Burundi, ngo amashure akukira Ekleziya Katolika asanzwe akunzwe ku bw’inyigisho z’akanovera zihatangirwa, be n’indero runtu na rukristu ayo mashure atanga. Akaba yizeye ko muri iyo nzira nyene, n’ubu iyo kaminuza igiye gufasha mu kuzoramura indongozi zishira imbere ubuntu n’ubushobozi.

Uwo mugambi ngo urakengurukwa n’indongozi z’igihugu c’Uburundi, nk’uko vyamenyeshejwe n’icegera c’Umukuru w’ico gihugu, Prosper Bazombanza, aho yavuze ko Leta yaserukiye muri uwo musi mukuru itobura kunezerwa no kwumva uwo mugambi mwiza wa Ekleziya Katolika y’i Burundi uzanye intererano ingana ityo mw’iterambere ry’igihugu. Akaba yarateye intege iyo Ekleziya kuri uwo mugambi, na rirya na we nyene ngo abona ko ukugarukira akanovera keza mu ndero bikenewe.

Ibijanye n'iterambere ry'umuntu ni icipfuzo cari gisanzweho muri Diyoseze Nkuru ya Bujumbura, nk’uko tubisanga mu gitabu c’inama ya mbere y'umuryango wa Diyoseze yabaye kuva mu mwaka w'2006 gushika mu w'2019, ivyapfunditswe muri iyo nama bikaba ari na vyo vyisunzwe mu gukora indinganizo y'ubutumwa bwa Diyoseze mu kiringo c'imyaka itanu, be n'ubw'amaparuwase n'ibindi bisata vy'ubutumwa bigize iyo Diyoseze, be no mu gutegekanya ku mwaka ku mwaka ibirangurwa mu mwaka w'ubutumwa kanaka.

Aho muri iyo nama ya mbere y'umuryango wa Diyoseze abanyamuryango wa Diyoseze bashiraho igisata c’iterambere, akaba ari uko ngo babonye nyene ko iterambere ry'umuntu mu mpande zose z'ubuzima rishobora gufasha cane mu bijanye no gusubiza hamwe mu mibano. Na none «iterambere» ngo ni na ryo zina rishasha ry'amahoro ryigishijwe na Papa Paulo-VI, nk'uko bigarukwako na Musenyeri Gerevazi Banshimiyubusa.

Umugambi wa Kaminuza Katolika rero muri iyo ntumbero ukaba na wo waja wariyumviriwe igihe kirari gito, haraheze imyaka ishika kuri 15, kuko wemejwe n'inama yose y'abepiskopi Katolika bo mu Burundi, hari mu mwaka w' 2011. Diyoseze Nkuru ya Bujumbura, igomba itangurane na Campus y'i Bujumbura, ariko hariho n'izindi Diyoseze ziri mu nzira. Iyo kaminuza izoba ifise ibigo nʼibisata mu madiyoseze ya Ngozi, Muyinga, na Gitega n'aho itaravyemeza neza.

Michel Nibitanga, CEDICOM

Ivyiyumviro

Rondera

Urutonde rw'Imisa