Abamalayika baguma bihweza ubuninahazwa bw’Imana, bakaba n’intumwa z’Imana zo kumenyesha umugambi w’Imana, n'abarinzi bacu; rero ntidutangwe kubambaza ngo batugume hafi, baturinde, ntitwigere twikura mu nyonga z’Imana

Bavukanyi, uko umwaka utashe kw’igenekerezo rya 29 Nyakanga, twama duhimbaza Abamalayika bakuru: Mikaeli, Gabrieli na Rafaeli. Muri uyu mwaka w’2026 tubahimbaza kuri uyu musi wa kabiri. Kw’igenekerezo rya 02 Gitugutu na ho ni umusi mukuru w’Abamalayika barinzi bacu. Ubwo abatari bake muri twebwe turibuka kwambaza abamalayika?

Tubiravye no muri Bibliya, Abamalayika bari mu mugambi w’Imana: baguma bihweza ubuninahazwa bw’Imana, bakaba n’intumwa z’Imana zo kumenyesha umugambi w’Imana. N’amazina yabo arabisigura neza.

Mikaeli, (Micha-El) bisigura ngo: «Ni nde ameze nk’Imana, yo ata na kimwe yogereranywa?» Igitabu c’Ivyahishuwe kimwerekana nk’intwazangabo iranga intsinzi y’Imana kuri sekibi. Mu bihugu bitandukanye, amaparuwase amwe amwe, amasengero n’ibindi bibanza vyaramutoyeko umuvunyi.

Gabrieli (Gabri-El) bisigura ngo «Imana yarerekanye ubukomezi bwayo.» Gabrieli ni umumalayika yatumwe kuburira Bikira Mariya inkuru nziza iheta izindi zose, ko ari we azovyara Umwana w’Imana, umukiza w’isi. Ni we kandi yaburiye Zakariya ivuka rya Yohani Batista, integuza y’Umukiza.

Rafaeli (Rapha-El) bisigura ngo «Imana iratuyobora ikadukiza». Rafaeli turamubona muri Bibiliya igihe yaherekeza Tobiya kurondera uwo bazokwubakana, yongera akiza se Tobito uruhumyi! Rafaeli ni intumwa y’Imana ihumuriza abantu, ibasubiriza umutima mu nda mu kubaronsa ivyo bakeneye.

Abantu batari bake kw’isi baritwa ayo mazina. Natwe ntidutangwe kwambaza abo bamalayika ngo batugume hafi, ngo ntitwigere twikura mu nyonga z’Imana.

Marie Rose Ngendakumana, CEDICOM

Ivyiyumviro

Rondera

Urutonde rw'Imisa