Icivugo ngenderwako c'umusi mpuzamakungu ugira uwa 61 wahariwe ukumenyesha amakuru caraye kimenyekanye, Nyenubweranda Papa Léon XIV akaba yashingiye ku kwiyubara ku nkuru ndenzarugero, ivyo bita «clickbait» mu congereza canke «piège à clics» mu gifaransa, agasaba

Ku cicaro ca Ekleziya Katolika i Vatikano haraye hamenyekanishijwe icivugo ngenderwako c'umusi mpuzamakungu ugira uwa 61 wahariwe ukumenyesha amakuru, mw'itangazo ryashizwe ahabona n'igisata ca Ekleziya c'ukumenyesha amakuru, ku mutaga wo kuri uyu wa kabiri igenekerezo 29 Nyakanga 2026. Iryo tangazo rikaba rimenyesha ko icivugo Nyenubweranda Papa Léon XIV yatoye gishingiye ku kwiyubara mu bihe vy’inkuru zigira ibihambaye ibitari vyo, ivyo bise «clickbait» mu congereza canke «piège à clics » mu gifaransa.

Uwo Mwungere wa Ekleziya kw'isi akaboneraho gusaba abantu kutihutira kunebagura abandi no kubakumira no kubacira umukenke bafatiye ku bibandikwako, ahubwo «bagashira imbere ubushishozi» mu gusoma ibibavugwako.

Ijambo «clickbait» mu congereza canke «piège à clics» mu gifaransa risigura «inkuru zigira ibihambaye ibitari vyo canke zikakamisha ibintu ku rugero rurengeye ukuntu biba vyabaye.» Bene izi nkuru tuzisanga cane cane ku mihora ngurukanabumenyi imwe imwe y'abandika inkuru bashikuza.

Usanga ziba zifise umutwe w'amajambo canke amasanamu y'indenzarugero, ahomeka inyifato ku muntu canke ku mugwi w'abantu kanaka, canke mbere izo nkuru zikaba zuzuye ubwangushi gusa, ata kindi zakorewe atari uguhababura abantu ngo bihutire gufyonda ku kararo kinjiza mw'ido n'ido, ico bita «cliquer» mu mvugo y'abakoresha ubuhinga ngurukanabumenyi. Ziba zifise amajambo ahinyanyuye, atera inyota yo kumenya ibivugwa muri iyo nkuru, ariko wamara gufyonda kuri utwo turaro ugasanga nta kirimwo, canke ibivugwayo ari ibintu bisanzwe cane, bitishura ku co umutwe w'inkuru canke intangamarara yari yagusezeraniye.

Tugarutse kuri iryo tangazo rero ryaraye rimenyeshejwe amezi make imbere y'ubutumwa bw'icese bw'Umusi mpuzamakungu wahariwe ukumenyesha amakuru buzosohoka ku musi mukuru w'umweranda Fransisko w'i Sales, umuvunyi w'abamenyeshamakuru n'abanditsi, uzohimbazwa ku wa 24 Nzero 2027, iryo tangazo rimenyesha ko «ukwiyubara mu muvuduko umuntu aba arimwo wo gukurikirana ivyandikwa ku mbuga ngurukanabumenyi bifise ico bihindura ku rugero umuntu aba yari gushikanako mukwakira ubumenyi akura kuri izo mbuga, ariko kandi no mu bwimbike bw'ibiyago tugiriranira n'abandi».

Muri iryo tangazo, tukaba dusabwa guhindura uburyo duhanahana amakuru iyo duhuye n'uwundi, tukamwakirana umutima wiyubara ha kwihutira kumunebagura no kumucira umukenke. Iryo tangazo rigira riti: «Duhamagariwe kurabisha abandi amaso y'urukundo n'umwitwarariko, ni ho tuzoshobora kubona isi na bene wacu canke na twebwe nyene ubwacu nk'uko Kristu atubona, akaduhamagara mw'izina nk'uwudukunda nyene. Uguhanahana amakuru n'abandi bihinduka mu gihe duhisemwo kwerekeza ku bandi indabo ibasanganira, ha kubacira urubanza».

Iryo tangazo rirerekana ukutishimira ingendo y'«ukujana nyabahururu kwibonekeza ku bakurikirana imbuga ngurukanabumenyi, aho usanga baca bishurana agashavu ku vyo basoma, canke bakerekana ubucuti bugoyagoya, bihutira kunebagura no kubatererana, mu gihe ahubwo ukwiyumanganya ari uburyo bushemeye bwo kwerekana ubugwaneza, ukwiyugururira uwundi n'ugushaka kumenya ukuri ku bimuvugwako. Twovyita ko ari uguhanahana amakuru rukristu, ingabirano tuvoma kwa Yezu, we yabona vyose kandi akareka bakamukorako».

Iryo tangazo rigatumirira abantu gutosora ivy'ukwugurukira abandi mu guhanahana amakuru muri iki gihe ca «clickbait». Kukaba nka kwo, uguhanahana amakuru ntikugarukira ku gutangaza amajambo gusa, ahubwo kurinjira mu bumuntu bw'umuntu wese yuzuye, kandi bikadutumirira mu bunywanyi na we, haba mu ndabo, mu kwumvirizanya no mu kwumviriza akamotera kiwe, ni ho duheza tukagendera dutyo umuhamagaro wa Kristu.

Vyasomwe na Michel Nibitanga, CEDICOM

Ivyiyumviro

Rondera

Urutonde rw'Imisa