Bavukanyi, twibukanye ko twatanguye ukwezi kwa Gitugutu kwahariwe Irozari. Ekleziya yarashimye kudutorera ukwezi kwa Gitugutu ngo tuguharire Umuvyeyi Bikira Mariya mu buryo busumbirije. Muri uku kwezi, Ekleziya idutumirira cane cane kwambaza Imana duciye kuri Bikira Mariya, mu gisabisho c’Irozari.

Muri ico gisabisho turazirikana amabanga y’icungurwa ryacu, na ryo rikaba rifatiye ku vyaranze ubuzima bwa Yezu. I Fatima, n’ahandi hose Bikira Mariya yabonetse, adusaba kuvuga ico gisabisho imisi yose, na vyo bikadufasha kwubaha Yezu na Nyina wiwe.

Aberanda batari bake babayeho mu bunywanyi budasanzwe hamwe na Bikira Mariya, bamwe muri bo barashikirije ico bemera kuri uwo Muvyeyi no ku masabo yiwe. Ishapule iradukirurutsa, itwerekeza kwa Yezu; iratyorora imitima yacu, ikadushikana ku ntsinzi; iduha inema nyinshi zo gutsinda ingeso mbi, ikatunywanisha n’Imana n’abantu; turaharonkera n’imigisha y’ubwoko bwose.

None bavukanyi, twogira inyifato iyihe mu kuvuga igisabisho c’Irozari muri iki gihe turimwo? Twokwirinda kuvuga amakosa; rimwe rimwe arateba agacika akamenyero. Twame tuyivuga dufise intumbero, tubona inema dukeneye gusaba, ingeso mbi dushaka guheba, n’ingeso nziza dushaka kwigana.

Ntituvuge ishapule nk’itegeko, ngo tuyifate nk’umuzigo twiremetse, ahubwo nituyivugane akanyamuneza, tuyifate nk’ikiyago c’umutima tugirana n’Imana duciye kuri Bikira Mariya. Ugusoma ishapule tutazirikana, turandagata canke tumira amajambo, nta vyamwa bituzanira, nta bweranda bidushikanako. Umurongo umwe w’ishapule uvuzwe neza uruta ibihumbi vy’amarozari arandagase!

Ico gisabisho kirusha vyose guhimbara Bikira Mariya. Iyo Ekleziya canke umuntu ari mu kaga, urikora kuri ico gisabisho kandi kirafasha. Papa Pio-IX ni we yavuze ati: «Abitwaje Irozari basumvya ubukomezi abitwaje icumu.»

Bavukanyi, natwe tugire umwete mu kuvuga ico gisabisho c’Irozari twambaza Umuvyeyi wacu Bikira Mariya ngo atuvugire ku Mwana wiwe Yezu Kristu mu biduhanamiye, kugira ngo tuharonkere akoyoko k’imitima yacu.

Marie Rose Ngendakumana, CEDICOM