
Umuryango w’ababikira b’aba
Annonciades b’i Heverlee waragize akanyamuneza muri Paruwase Jenda, ku musi wa
gatandatu igenekerezo rya 3 Gitugutu 2026, aho bari baramutse bigina ababikira batanu
bashasha bagize indagano za mbere, be n’abandi batanu bagize indagano za
burundu, mu nkuka y’imisa yari irongowe na Nyenicubahiro
Musenyeri Gerevazi Banshimiyubusa, Umwepiskopi mukuru w’i Bujumbura, ari kumwe
na Nyenicubahiro Musenyeri Evariste Ngoyagoye, Umwepiskopi mukuru
w’inararibonye wa Diyoseze.

Musenyeri Gerevazi
Banshimiyubusa yararemesheje abo babikira bashasha ko ibanga ry’ukwihebera
Imana ari ibanga rishemeye cane kandi rishoboka. Yarongeye ababwira ko mu
kwinjira muri iryo banga ry’ukwihebera iyo Mana, ko babwirizwa kuyihereza ngo
ibahindure, gutyo bashobore kubera ibanga batorewe. Yagize ati: «Ni mwebwe uyu
musi mubwirizwa kuba imperezwa z’Imana.»
Kukaba nka kwo, abo babikira, ngo bisaba kuba biteguriye «gupfa» ku buzima bahoramwo, rimwe na rimwe ngo «bakabambwa no ku Musalaba», bakabamba ingeso mbi, gutyo bakihereza Imana bwa mbagwa nzima kandi nyeranda, ishika Imana ku nyota.
Igituma baheba ubuzima abandi bose biherezaIvyo ngo bibasaba guheba
ubuzima nk’ubw’abandi bose, bakaza riho ari ibiremwa bishasha. Bitabaye ukwo,
ngo bohava basanga bari mu mayira abiri, na yo «amayira abiri akaba yarananiye
imfyisi», maze ubuzima bwabo bw’ukwihebera Imana ntibuheze ngo bubaryohere.
Ngo bibuza kwubaka ingo,
bakagumana ubwerentegerwa; bemera ubworo, bagahitamwo itunga ryabo rikuru, ari
ryo Imana; bemera ubugamburutsi mu kuguma bakira ishaka ry’Imana, kugira ngo
babere abantu b’iyi si ibimenyetso bija birabakebura ko hariho ubundi buzima
budashingiye ku vyo isi ishira imbere. Na nonde indagano zabo bari baramutse
bashikiriza mu buryo bw’ikimenyetso kiboneka, ngo ni vyo zibwirizwa kubashikanako.

Uwuyoboye umuryango w’aba-Annonciades
mu ntara yubutumwa y’Uburundi n’Urwanda, Mama Devote Nikwigize, kw’izina ry’uwuyoboye
uwo muryango kw’isi yose, yarakengurukiye Umwepiskopi Mukuru w’i Bujumbura
yateye iteka urwo rubanza, agahagararira umugirwa wo kwakirira abo babikira
indagano zabo, abagize iza mbere n’abagize iza burundu. Yarashimiye kandi n’abavyeyi,
incuti n’abagenzi baje gushigikira ibibondo vyabo.
Abari baramutse bagira
indagano, Mama Devote Nikwigize yabasavye gukomera kw’ibanga. Yarabipfurije umutima
waranze Bikira Mariya bisunga, ari wo: uwuzira akanenge, wicisha bugufi, w’ukwemera,
w’ugusenga, w’ukwiyumanganya, uwushima ubworo, uw’impuhwe, be n’izindi ngeso
nziza zaranze uwo muvyeyi, bakazigira izabo, haba mu mvugo, mu vyiyumviro no mu
ngiro. Akaba yarabemereye kubashigikiza igisabisho.
Mwomenya ko umuryango w’ababikira
b’aba Annonciades b’i Heverlee ari umuryango wisunga Bikira Mariya aho yaja kwa
mwene wabo Elizabeti kumumenyesha Inkuru Nziza ko yibungenze umwana w’Imana
(Annonciation), ari na ho havuye izina ryabo (abatoranye ubutumwa bwo
kumenyekanisha Umukama).
Watangujwe mu mwaka w’1952,
mu gihugu c’Ubufaransa, utangujwe na Yohana mweranda, umuvunyi wawo, uwo na we
akaba yari umwigeme w’umwami w’Ubufaransa Ludoviko-XI, ariko utangura ari
igisata c’abahangamana.
Wagiye gushika mu gihugu c’Ubibiligi
mu mwaka w’1787, na Patiri Pierre Jacques de Clerck, kumwe na Jeanne mweranda
wo mu Bufaransa, uhashika nk’igisata c’abihebeye Imana b’uwo muryango
barangurira ubutumwa bwabo mu bindi bihugu (les apostoliques). Mu Burundi uwo
muryango wahashitse mu mwaka w’1958, umubano wa mbere utangurira mw’i Jenda
nyene.

Kw’isi yose, uwo muryango urangura
ubutumwa mu bisata vy’indero (ugukomeza ukwemera biciye mu mashure mato mato
n’ayisumbuye), ukwigisha abitegurira amasakramentu, ukuvura abarwaye,
ukuremesha abatagira kiraba, be n’ugufasha abibaruka.
Mu Burundi uwo muryango
uhafise imibano itanu: mu gisagara c’i Bujumbura, ahari umubano mw’i Ruhero
muri Paruwase Katédrale Regina Mundi; muri Paruwase Jenda ahari imibano itatu
(uwitiriwe umusozi Carmel, uw’irerero ry’abanovise witiriwe umweranda Jeanne,
be n’umubano Magnificat); be no muri paruwase Buziracanda ahariko haratunganywa
umubano mushasha.
Mwomenya ko uwo muryango
uherutse kuronswa intara y’ubutumwa mu karere k’Uburundi n’Urwanda, umukuru w’iyo
ntara akaba ari umubikira w’umurundikazi nyene. Intara z’ubutumwa zose z’uwo
muryango ni zitatu: uw’Ububiligi, uwa Congo iri kumwe na Cameroun, be n’Uw’Uburundi
n’Urwanda.
Uwuyoboye umuryango w’aba-Annonciades
mu ntara y’ubutumwa y’Uburundi n’Urwanda avuga ko ashima intambwe uwo muryango
ushitseko. Umwepiskopi mukuru akaba yarakeje uwo ayoboye uwo muryango mu
Burundi no mu Rwanda, kumwe n’abandi bazobandanya bayobora uwo muryango,
yongera arabipfuriza inema yo kuwuyobora neza, kugira ngo akarangabutumwa kawo
gashobore kugirira akamaro Uburundi n’isi yose.
Michel Nibitanga, CEDICOM
Aleluya, aleluya.
Yeruzalemu, igine Umukama,
ni we arungikira isi ijambo ryiwe.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (17, 11-19)
Muri irya misi, Yezu yariko aragenda i Yeruzalemu, aca ku rubibe rwa Samariya n’Ubugalile. Ariko araca mu mihana yaho, hakaba abantu cumi barwaye imibembe baza bagana iyo yari ari. Bashira ijwi hejuru bakiri kure, bati: «Yezu, Mwigisha, tugirire ikigongwe!» Na we ngo ababone, arababwira ati: Nimugende mwiyereke abaherezankuka.»  Na bo bashitse mu nzira, babona bakize.
Umwe muri bo rero ngo abone yakize, aca asubira inyuma, aza arishongora aninahaza Imana; ashitse imbere ya Yezu; akubita ibipfukamiro hasi amukurira ubwatsi. Kandi uno yari Umunyasamariya. Yezu rero arabaza ati: «Mbega, ntibakize bose uko bari icumi? Nta wundi yoboneka ngo agaruke aninahaze Imana, atari uwo munyankiko! Araheza amubarira ati: «Va hasi, ugende; ukwemera kwawe kuragukijije.»