Abaserukiye abakristu b'abarundi mu gushikiriza igisabisho c'ukwishikana kuri Muvyeyi Bikira Mariya ni abaserukiye Leta y´uburundi, abaserukira Inama Nshingamateka na Nkenguzamateka, uwuserukira umugambwe uri ku butegetsi, abasaseredoti, n'abaserukira intwaro

Inyuma y´ikiringo c´isangira ku Meza meranda y'Umukama mu Nkuka y'imisa yaherejwe ku kirimba c'Umuvyeyi Bikira Mariya c'i Mugera muri Diyoseze Nkuru ya Gitega, haciye haba umugirwa w'ukwishikana kuri Bikira Mariya Umuvyeyi wa Yezu Kristu n´uw´Ekleziya. Hari kuri uyu wa kane igenekerezo rya 15 Myandagaro 2019, umusi mukuru w'iyurizwa mw'ijuru ry'Umuvyeyi Bikira Mariya, ukaba n'umusi w'iyugururwa icese ry'amezi atatu y'ibikorwa vy'ukumenyesha Inkuru Nziza ku wabatijwe wese.

 

Abaserukiye abakristu b'abarundi mu gushikiriza igisabisho c'ukwishikana kuri Muvyeyi Bikira Mariya ni abaserukiye Leta y´uburundi, abaserukira Inama Nshingamateka na Nkenguzamateka, uwuserukira umugambwe uri ku butegetsi, abasaseredoti, n'abaserukira intwaro (Burumatari w'intara ya Gitega na Musitanteri wa Komine Bugendana), abo bose bakaba mu gisabisho bashikirije uwo Muziranenge bamusavye ngo asabire abarundi n´isi yose.

 

Inyuma y´ugukenguruka n´uguhezagira ibimenyetso, Umwepisikopi mukuru wa Diyoseze Nkuru ya Gitega yaciye ashikiriza igihugu ceranda c´Imana umuhezagiro w´uyo musi. 

Mwomenya ko muri ukwo kwishikana kuri Bikira Mariya kabaye n'akaryo ko guhimbaza imyaka 58 iheze Uburundi bwishikanywe kuri Bikira Mariya Umugabekazi w´Amahoro, aho hari mu gihe Uburundi bwariko bwitegurira ukwikukira, hakaba hari ku wa 15 Myandagaro 1961, aho abakristu isinzi n´abari barongoye igihugu ico gihe bahurira muri ico kibanza ceranda, bitavye akamo bari batewe n´abepisikopi.

 

Iyi nkuru yerekeye ukwishikana ku Muvyeyi Bikira Mariya be n'iyugururwa icese ry'amezi atatu y'ibikorwa vy'ukumenyesha Inkuru Nziza ku wabatijwe wese murashobora kubandanya muyikurikirana ikibiriraho ku mihora ngurukanabumenyi y'ibi birori: Facebook, Radio Maria Burundi.

 

Gonzalve NTASHIMIKIRO, CEDICOM

Ivyiyumviro

Rondera

Urutonde rw'Imisa