Ku musi w'Imana igenekerozo rya 15 Nyakanga,
abaririmbiramana bitiriwe «Umweranda Visenti wa Paulo» bo muri Paruwase Mukiza-Mweranda
barahimbaje yubile y'imyaka 25 bamaze barangura Ubutumwa bw'uguhimbaza Imana
biciye mu ndirimbo zo mu Nkuka z'imisa. Ibirori vyatangujwe n'Inkuka y'Imisa yaherejwe
ku gihe c'isaha zine zo mu gitondo. Iyo nkuka y'Imisa ikaba yaraherejwe na Patiri
mukuru wa Paruwase, Patiri Désire Ninahazima, ari kumwe na Patiri Jules Kubwimana
yahoze aririmba muri uwo mugwi.
Mu nkuka y'Imisa, Patiri Désire Ninahazima yatumiriye
abo baririmbiramana kwinsunga ijambo Paulo yavuze, ati: «Ndakengurukira gose
uwankomeje, ari We Kristu Yezu Umukama wacu, kuko yanyizigiye, akantera iteka
ryo kumukorera.» Uwo musaserdoti yaciye ababwira ko boriroresha ku buzima bwabo,
bakitwaririka gusoma ubuzima baburoresha kuri iryo jambo Paulo yavuze
ry'ubukengurutsi, barabe ico Imana ikora mu buzima bwabo, ko ingabirano bafise
bazihawe ku bw'urukiza rwa bene wabo.
N'abaririmbiramana barakengurutse kuri iyo
myaka 25 bamaze muri ubwo butumwa, bakaba baranahaye abasaseredoti ingabire igizwe
n'umutamana bambara mu guhereza Inkuka ya misa (witwa «chasuble» mu gifaransa),
bongera barashikana n'ayandi mashikanwa agizwe n'ibifungurwa.
Tubamenyeshe ko umugwi w'abaririmbiramana witiriwe «Umweranda Visenti wa Paulo» bo muri Paruwase Mukiza-Mweranda watanguye mu mwaka w'1994, utangujwe n'abari bavuye muri Paruwase Kinama, bahunze intambara yo mu mwaka w'1993. Bashitse mu Nyakabiga, ni ho basaba Patiri Salvator, Patiri mukuru w'ico gihe, ko botangura uwo mugwi.
Mu mwaka w'1994 ni ho rero baca batangura, batangura
ari abahungu gusa, kuko no mu Kinama bahora baririmba ari abangu gusa. Ariko mu
Nyakabiga hoho, ntibashimye ko abahungu bokwinjira mu mugwi bonyene, baciye riho
biyumvira kwugururira imiryango n'abigeme. Abo baririmbiramana batanguranye
ubukene bw'ibikoresho, kuko gushika mu mwaka w'1995 ata gicurarangisho na kimwe
bari bafise. Bagiye bararonka ibikoresho buhoro buhoro.
Marie Chantal NZEYIMANA, Paruwase Nyakabiga
Aleluya, aleluya.
Umukama yavuze ati: «Ewe Toma, wemeye kuko umbonye.
Hahiriwe abazokwemera ata co barinze kubona.»
Aleluya.
Â
Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)
Imisi umunani iheze, Yezu araza
Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.
Yongera ababwira ati: «Nimugire amahoro! Kumwe Data yantuma, nanje ni ko
ndabatumye.» Ababwiye ivyo, arabahuha ati : « Nimuronke Mutima Mweranda. Abo
muzorekurira ibicumuro, bazoba babirekuriwe, abo muzobigumizako na bo,
bizobagumako.»
Aho Yezu yaza, Toma, umwe wo muri bamwe Cumi na babiri, ari we bita Didimo,
ntiyari muri bo. Abandi bigishwa bamubwiye bati: «Twabonye Umukama», abishura
ati: «Ntiboneye mu biganza vyiwe intoboro za ya misumari, ngo nshire urutoke mu
ntoboro zayo, n’urushi mu rubavu rwiwe, sinzokwemera.»
Imisi umunani iheze, abigishwa basubira guteranira muri ya nzu, na Toma bari
kumwe. Yezu araza, inzugi zugaye, ahagarara hagati muri bo ati: «Nimugire
amahoro!» Hanyuma abwira Toma ati: «Shira urutoke ngaha: ng’ibi ibiganza vyanje;
zana urushi rwawe kandi urushire mu rubavu rwanje: ureke rero kuba ikigaba, ariko
wemere.»
Toma amwishura ati: «Mukama wanje, Mana yanje!» Yezu na We amwishura ati:
«Ewe Toma, wemeye kuko umbonye: hahiriwe abazokwemera ata co barinze kubona.»
Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.
Radio Maria
Eglise Catholique
Radio Vatican
Foyer de Charit