Mu ntumbero y'ukurondera kumenyana gusumba uko
vyahora, urwaruka rugizwe n'imisore n'inkumi bahurikiye mu mivukano itandukanye
ikukira Paruwase Katedrale Regina Mundi barahuye ngo basenge, bongere baninahaze
Imana bari hamwe. Hari kuri uyu wa gatandatu iginekerezo rya 14 Nyakanga 2019.
Uwo musi watanguye kw'isaha zibiri n'igice zo mu gitondo (8:30), utangujwe
n'igisabisho c'ukuninahaza Imana, gikurikirwa n'inyigisho yatanzwe n'umuvukanyi
Vianney BIGIRINDAVYI ku civugo: «Guhura na Yezu».
Inyigisho y'uwo musi yari igabuwemwo ibice bitatu bigira biti: «Birihutirwa kandi birakenewe guhura na Yezu; Ubuzima muri Kristu; Ukuzigama ubucuti bw'Imana». Muri iyo nyigisho, harasiguwe ko vyihuta kandi bikenewe ko urwo rwaruka rwohura buhure na Yezu kugira ngo ahindure ubuzima bwarwo, kuko uwahuye na Yezu abigaragaza mu nyifato, ku buryo n'abandi bamubona biituma baninahaza Imana, bagaheza bakamushingira n'intahe.
Ku bw'umuvukanyi Vianney BIGIRINDAVYI, uguhura na Yezu biratuma umuntu adasubira kwiganyira, n'aho ibibazo bitabura. Yezu ngo araheza akabimuremurura, akamukiza ibicumuro, akongera akabimubohora. Ariko ivyo vyose ngo bishoboka ari uko umuntu yemeye ko Yezu yinjira mu buzima bwiwe, akanywana na we.
Uwo muvukanyi yabandanyije asigura ko ari ngombwa ko umuntu arondera ubuzima muri Yezu mu maguru masha, akamwemera ko banywana, ivyo bigaherekezwa n'ingingo umwe wese yifatira y'uguhereza ubuzima bwiwe Imana, ukugendera inyifato nziza ihesha icubahiro Imana, haba mu nyambaro, mu mvugo, mu kugira abagenzi beza, no mu kubohoka ku mpengamiro zose zimushira kure y'Imana.
Vianney BIGIRINDAVYI akaba yasavye urwo
rwaruka ko vyoba vyiza banabishize mu nyandiko, kugira ngo bazokwame bavyibuka.
Ikindi, ngo bokwihatira kwitaba amakoraniro kenshi, bakongera bakitaba n'ubutumwa,
kuko ngo ari vyo bikomeza ubucuti bushitse hamwe n'Imana.
Inyigisho zakurikiwe n'ugusabikanya ico umwe umwe wese yaronse mu nyigisho, be n'uguhanahana ico bokora kugira ngo urwaruka ruri muri Paruwase Katedrale Regina Mundi rurushirizeho guhura na Yezu. Zarangiriye ku gisabisho c'ugusozera, kw'isaha zitanu n'igice (11:30).
Twomenyesha ko imivukano ikukira Paruwase Katedrale Regina Mundi ingana icumi. Muri yo, itatu ni iyo muri Karitiye Gasekebuye, ibiri mu Kinanira ya kabiri, ibiri mu Kinanira ya gatatu, umwe wo muri Karitiye INSS, umwe muri Rohero, iyindi na yo muri Karitiye Asiatique.
Gloria NGENZEBUHORO, Paruwase Katedrale Regina
Mundi
Aleluya, aleluya.
Umukama yavuze ati: «Ewe Toma, wemeye kuko umbonye.
Hahiriwe abazokwemera ata co barinze kubona.»
Aleluya.
Â
Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)
Imisi umunani iheze, Yezu araza
Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.
Yongera ababwira ati: «Nimugire amahoro! Kumwe Data yantuma, nanje ni ko
ndabatumye.» Ababwiye ivyo, arabahuha ati : « Nimuronke Mutima Mweranda. Abo
muzorekurira ibicumuro, bazoba babirekuriwe, abo muzobigumizako na bo,
bizobagumako.»
Aho Yezu yaza, Toma, umwe wo muri bamwe Cumi na babiri, ari we bita Didimo,
ntiyari muri bo. Abandi bigishwa bamubwiye bati: «Twabonye Umukama», abishura
ati: «Ntiboneye mu biganza vyiwe intoboro za ya misumari, ngo nshire urutoke mu
ntoboro zayo, n’urushi mu rubavu rwiwe, sinzokwemera.»
Imisi umunani iheze, abigishwa basubira guteranira muri ya nzu, na Toma bari
kumwe. Yezu araza, inzugi zugaye, ahagarara hagati muri bo ati: «Nimugire
amahoro!» Hanyuma abwira Toma ati: «Shira urutoke ngaha: ng’ibi ibiganza vyanje;
zana urushi rwawe kandi urushire mu rubavu rwanje: ureke rero kuba ikigaba, ariko
wemere.»
Toma amwishura ati: «Mukama wanje, Mana yanje!» Yezu na We amwishura ati:
«Ewe Toma, wemeye kuko umbonye: hahiriwe abazokwemera ata co barinze kubona.»
Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.
Radio Maria
Eglise Catholique
Radio Vatican
Foyer de Charit