Ihimbazwa ry'umusi mukuru w'Aberanda bose muri katedrale Regina Mundi

«Nidushire amazida kuko amarembo y'ijuru yugururiwe twese», vyavuzwe na Musenyeri Gerevasi Banshimiyubusa

Umusi mukuru w'Aberanda bose uratwuzuza umwizero yuko twese twugururiwe amarembo y'ijuru ariko bigasaba guca mu nzira abandi badacamwo ariko kweresha amakanzu yacu amaraso ya wa Mwagazi.  

Kur'uyu wa gatanu itariki imwe y'ukwezi kwa munyonyo 2019 twahimbaje umusi mukuru w'Aberanda bose muri Ekleziya katorika. Muri katedrale Regina Mundi, inkuka y'imisa yaherejwe n'Umwepiskopi mukuru wa diyoseze nkuru ya Bujumbura, Gerevasi Banshimiyubusa. Yisunze igisomwa ca mbere casomwe mu gitabo c'Ivyahishuriwe Yohani, yasiguye ati abo duhimbaza uno musi n'abatsinze urugamba rwo ngaha kw'isi, rwa rugamba rw'urukundo rutsinda urwanko, rwa rugamba rw'ubuzima rutsinda urupfu baciye k'ubuzima bwabo bwa misi yose mw'ibanga bari bashinzwe iryariryo ryose. 

Umuntu wese ashobora kuba mweranda

Yongeyeko kandi ati uwo musi mukuru utwuzuzamwo umwizero n'akanyamuneza yuko natwe dushobora kuba beranda kuko abo bose bari mw'ijuru bari abantu nka twebwe kandi babayeho kw'isi nk'iyi turiko turabamwo. Ati ako kanyamuneza tugaterwa ubwa mbere nuko igitigiri c'Aberanda twumvise mu bisomwa ari igitigiri cuguruye aho umuntu wese ashobora kuba mweranda. «Batubwiye ko baje bava mu mashinga yose, mu bwoko bwose, mu ntara zose bavuga mu ndimi zose. Ivyo vyose babitubwiye kugira ngo dushire amazinda twumve yuko amarembo y'ijuru yugururiwe twese. Baraduhumurije rero k'ubweranda bushoboka kandi bushobokera bose».

Musenyeri Banshimiyubusa yamenyesheje ko ikindi kitwuzuza agahimbare kur'uyo musi aruko Aberanda bari mw'ijuru batugirira impuhwe bakatuvugira na cane cane iyo tugiye turabitura nk'abavunyi bacu. Ati ikindi kitwuzuza umwizero n'ubudasa bw'Aberanda hamwe n'ubudasa bw'amayira baciyemwo kuko nta mwerarnda asa n'uwundi, umwe wese afise ubutumwa bwiwe, afise ibanga ryiwe akagira igihe abayemwo. «Ico tuzi bahurirako bose nuko bagerageje kugendera rwa rukundo rw'Imana rwagiye ruriserura mubikorwa vy'urukundo rwitwararika abandi. Duhimbarwe rero kuko umwumwe afise umuhamagaro wiwe kandi tukaba twaramaze kuronka ingwati y'ubweranda muguhabwa ya batisimu yatugize abana b'Imana n'abana b'Ekleziya». Yahamagariye abakristu bose kugendera iryo teka bagakura mu gihagararo c'Abana b'Imana gushika base n'Imana.

 N'inzira itoroshe kuko inyuranye n'ivyo abantu bacambirwa

Umwepiskopi yisunze Inkuru Nziza yanditswe na Matayo itubwira banyaguhirwa Aberanda bose baciyemwo yerekanye ko naho iyo nzira yugururiwe twese ishoborwa n'abamenye gukurikira Yezu, bakemera kumwegera ngo abigishe. N'inzira ishoborwa n'abemeye kuza baraduga bicara aho Yezu yicaye, bamuronderera akanya n'aho koba na gatoyi naho boba barushe biriwe kurondera icotunga umuryango, iyo Mana ikabona ko wayegereye kugira base nayo. Ati n'inzira itoroshe kuko inyuranye n'ivyo abantu bacambirwa. «Kubaho nk'umworo, kubaho ufise umutima w'itonda, umutima w'impuhwe, umutima w'inda nsa bidusaba guhinduka gushika aho tubona ukundi ubuhirwe bwacu. Kubaho uremesha amahoro, guhagararira ubutungane kuri bose bisaba kuduga ku musozi kumwe na Yezu ngo akwuzuzemwo urukundo rw'Imana arirwo rugutuma ubabazwa n'uko iteka ry'Imana ririko rirahonyangwa mu gateka k'umuntu yiremeye»

Ati kandi iyo nzira irashobora kuvyura uruhamo n'ugutotezwa kuwuyiciyemwo, ukwo nikwo kweresha amakanzu yacu y'Abakristu twambitswe mw'ibatisimu  tukazeresha amaraso ya wa mwagazi wa pasika. N'uguca mu nzira idasanzwe abandi badacamwo ariko niyo nzira yonyene ishika. « Ndabipfurije kudatinya guca muriyo nzira Yezu atwigishije, muyicemwo mwishimikije igisabisho kivuye k'umutima kibaha akaryo ko kuganira n'Imana nk'umuvyeyi igihe cose, muyicemwo muza murihereza ijambo ry'Imana ngo mwame na ntaryo mumenya ishaka ryayo kandi abe ariryo murangura, muyicemwo na cane cane mukuza murihereza Ukaristiya nyeranda mwavyiteguriye neza, itwuzuzamwo ubuzima bw'Imana ikadutuma kandi twuzura urukundo rw'Imana ikadutuma, tugasa nayo»  

Grâce-Divine Gahimbare, Katedrale Regina Mundi

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»