Vikariya >

Gihosha >

Paruwase Gihosha - akanyamuneza ku bibondo vyari vyaramutse vyakira Yezu mw'Isakramentu ry'Ukaristiya ubwa mbere

Mu ntangamarara, Patiri Gilles Tchissambot yarakengurukiye abavyeyi bashimye ko abana babo baba abagenzi ba Yezu mu kumwakira mw'Ukaristiya. Ibisomwa vyeranda bikaba vyasomwe n'abo bana bari baramutse bahabwa Yezu mu rusangi rwa mbere. Igisomwa ca mbere kivuye mu gitabu c'ihunguka cagira kiti: "Ni Umukate Imana ibahaye ngo mufungure". Aho hari igihe Imana yagaburira mana abanyisrayeli bavuye mu Misiri baja mu gihugu c'isezerano. Ica kabiri na co kivuye mw'ikete Umutumwa Paulo mweranda yandikiwe abanyefezi, abatumirira kuvavanura n'umuntu wa kera yononekaye kubera ivyipfuzo vyiwe, bakigenza nkumuntu mushasha. 

Mu nsiguro y'ijambo ry'Imana na ho, Patiri Marc Nduwimana yaribukije abakristu ko mw'ibatisimu baronse ubuzima bw'abana b'Imana, arongera ati: "Umusi wose ujana n'ivyawo, kuko Imana irazi ico dukeneye mu buzima bwacu, igaheza ikaduha ico dukeneye buri musi".

Aho abo bana baja guhabwa isakramentu ry'Ukaristiya, baherekejwe n'indirimbo yatewe n'abaririmbiramana, baririmba bati: "Umubiri n'amaraso vy'Umukama wacu Yezu Kristu bifise igiciro kinini; ingo tugende imbere ya Altari, tuje kumwakira". Abana bahawe urusangi rwa mbere kuri uwo musi bakaba bashika 383.

Twobamenyesha ko ivyo birori bikaba vyatewe iteka n'abasaserdoti bava mu ma diyoseze atandukanye, nka Patiri Donatien Bacinoni arangurira ubutumwa muri Paruwasie Buyengero, Patiri Bernard Ntibuhezwa wo muri Diyoseze ya Bubanza, abasaserdoti bo muri Paruwase ya Yohani Batista mweranda Gilles Tchissambot, Patiri Jean Baptiste Niamy, Patiri Marc Nduwimana wo mu muryango w'Umwungere Mwiza n'Umugabekazi w'Isenakuro (Bon Pasteur et Reine  de la Paix) asanzwe afasha muri iyi Paruwase, hamwe na Patiri Jéremie Bukene, uyu wewe mbere akaba yarahanuye abo bana kutagira ikintu na kimwe borutisha Yezu, canke ngo bamugirire urwangara.

Ese ivyo bibondo vyokurana uwo mutima wo gukunda Imana mu kwamana inyota yo kumwakira.

Guy Darcy Iradukunda, Paruwase Gihosha     

Mu mumugwi umwe

Aleluya, aleluya.

Umukama yavuze ati: «Ewe Toma, wemeye kuko umbonye.

Hahiriwe abazokwemera ata co barinze kubona.»

Aleluya.

 

Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)

Imisi umunani iheze, Yezu araza

Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.

Yongera ababwira ati: «Nimugire amahoro! Kumwe Data yantuma, nanje ni ko ndabatumye.» Ababwiye ivyo, arabahuha ati : « Nimuronke Mutima Mweranda. Abo muzorekurira ibicumuro, bazoba babirekuriwe, abo muzobigumizako na bo, bizobagumako.»

Aho Yezu yaza, Toma, umwe wo muri bamwe Cumi na babiri, ari we bita Didimo, ntiyari muri bo. Abandi bigishwa bamubwiye bati: «Twabonye Umukama», abishura ati: «Ntiboneye mu biganza vyiwe intoboro za ya misumari, ngo nshire urutoke mu ntoboro zayo, n’urushi mu rubavu rwiwe, sinzokwemera.»

Imisi umunani iheze, abigishwa basubira guteranira muri ya nzu, na Toma bari kumwe. Yezu araza, inzugi zugaye, ahagarara hagati muri bo ati: «Nimugire amahoro!» Hanyuma abwira Toma ati: «Shira urutoke ngaha: ng’ibi ibiganza vyanje; zana urushi rwawe kandi urushire mu rubavu rwanje: ureke rero kuba ikigaba, ariko wemere.»

Toma amwishura ati: «Mukama wanje, Mana yanje!» Yezu na We amwishura ati: «Ewe Toma, wemeye kuko umbonye: hahiriwe abazokwemera ata co barinze kubona.»

Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.