Vikariya >

Gihosha >

Abaririmbiramana bo mu mugwi «St Curé d'Ars» bo muri Paruwase Gihosha mu mwiherero w'ukwitegurira umuvunyi wabo

Uwo mwiherero wabereye muri iyo Paruwase nyene, ku nyigisho bashikirijwe na Patiri Mukuru, Patiri Gilles Tchissambot. Iyo nyigisho yari ifise icivugo kigira kiti: «Ni nde Yohani Mariya Vianney mweranda?»

Uwo musaserdoti yatanguye avuga ku buzima bw'uwo mweranda, maze asigura ko ahanini ubuzima bwiwe bwari bugizwe n'igisabisho be n'ubunywanyi yari afitaniye na Mutima Mweranda. Abari baje muri iyo nyigisho, akaba yaranabatumiriye kumwigana, nk'uko bamutoye nk'umuvunyi wabo. 

Patiri Gilles Tchissambot ahejeje izo nyigisho, Longin Ndayikeje, umukuru w'uwo mugwi, yaravuze ico we na bagenzi biwe bugutse. Yavuze ko uwo mwiherero wabagiriye akamaro kanini, kuko ngo wabatumye binagura mu butumwa mu kubibutsa ko ibanga batorewe ari iry'ukuninanahaza Imana babicishije mu ndirimbo, atari iry'ukwinezereza bisanzwe.

Yasozereye amenyesha ko yashimishijwe n'ukuntu abo baririmbiramana bavyitabiriye ku bwinshi nk'uko mbere yari anavyiteze. 

Eka n'umwe muri abo baririmbiramana Daphrose Niyongere, yaragize ico avuga kuri uwo mwiherero, mu kumenyesha ko wari ukenewe cane.

Yagize ati: «Uwatwigishije yatwibukije ko uwuririmvye neza aba asenze kabiri, kandi ko iyo uri mu bandi uba usenze koko, nk'uko Yezu We nyene yavyivugiye, aho yavuga ko aho babiri canke batatu bakoraniye kwizina ryiwe, aba ari hagati yabo.»

Twobamenyesha ko umweranda Yohani Mariya Vianney (St Curé d'Ars) asanzwe ahimbazwa kw'igenekerezo rya 4 Myandagaro, buri mwaka.

Ndagijimana Emmanuel, Paruwase Yohani Batista mweranda

Mu mumugwi umwe

Aleluya, aleluya.

Umukama yavuze ati: «Ewe Toma, wemeye kuko umbonye.

Hahiriwe abazokwemera ata co barinze kubona.»

Aleluya.

 

Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)

Imisi umunani iheze, Yezu araza

Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.

Yongera ababwira ati: «Nimugire amahoro! Kumwe Data yantuma, nanje ni ko ndabatumye.» Ababwiye ivyo, arabahuha ati : « Nimuronke Mutima Mweranda. Abo muzorekurira ibicumuro, bazoba babirekuriwe, abo muzobigumizako na bo, bizobagumako.»

Aho Yezu yaza, Toma, umwe wo muri bamwe Cumi na babiri, ari we bita Didimo, ntiyari muri bo. Abandi bigishwa bamubwiye bati: «Twabonye Umukama», abishura ati: «Ntiboneye mu biganza vyiwe intoboro za ya misumari, ngo nshire urutoke mu ntoboro zayo, n’urushi mu rubavu rwiwe, sinzokwemera.»

Imisi umunani iheze, abigishwa basubira guteranira muri ya nzu, na Toma bari kumwe. Yezu araza, inzugi zugaye, ahagarara hagati muri bo ati: «Nimugire amahoro!» Hanyuma abwira Toma ati: «Shira urutoke ngaha: ng’ibi ibiganza vyanje; zana urushi rwawe kandi urushire mu rubavu rwanje: ureke rero kuba ikigaba, ariko wemere.»

Toma amwishura ati: «Mukama wanje, Mana yanje!» Yezu na We amwishura ati: «Ewe Toma, wemeye kuko umbonye: hahiriwe abazokwemera ata co barinze kubona.»

Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.