Vikariya >

Gihosha >

Ihimbazwa ry'isabukuru y'imyaka 15 umuvukano «Urwaruka rw'umuco» wo mu Gasenyi muri Paruwase Gihosha umaze ubayeho

Ivyo birori vyari vyatewe iteka na Patiri mukuru w'iyi Paruwase, Patiri Jules Tchissambo, ari na we yahereje inkuka y'imisa y'ubukengurutsi. Mu nyigisho yatanze, yaratumiriye abagize uwo muvukano gukundana nk'abavukanyi koko, kuko ngo burya mu mivukano mito mito ari ho imiryango ikomerera. 

Twaravuganye n'umwe mu batanguje uwo muvukano, Anita mutoniwabo, ari na we yabaye Umusuku wa mbere wawo, maze atumenyesha amamuko yawo. Yavuze ko uwo muvukano ugitangura bitari vyoroshe na gato ngo, kuko ngo wavutse mu gihe na Paruwase itari bwanavuke. Ngo basengera ku kirimba c'Umwepiskomi Mukuru wa Diyoseze Nkuru ya Bujumbura, aho bita muri «Évêché».

Na we Anastase Dusabe, asanzwe ari icegera c'Umusuku w'uwo muvukano, na we yatuyagiye ubuzima bw'uwo muvukano kuva utanguye. Yabanje kuvuga ko awumazemwo imyaka ine, kandi ko yawungukiyemwo ibitari bike bimukomeza mu kwemera kwiwe.

Eka na Bertrand Makobero, umwe mu rwaruka twayaze, nk'uwariko akurikirana inyigisho zitangirwa muri uwo muvukano, yaravuze na we icigwa yawukuyemwo mu myaka itanu awumazemwo. Yavuze ko yahakuye inyigisho zimufasha kwifatira ingingo mu buzima bwiwe. Akaba yahamagariye urwaruka guhurumbira izo nyigisho, kuko ngo ari ngirakamaro mu buzima bw'umukristu.

Tubamenyeshe ko uwo muvukano watanguye mu mwaka w'2005, uvyawe n'umuvukano wo muri Paruwase yitiriwe Yozefu mweranda wo muri zone Ngagara.

Emmanuel Ndagijimana, Paruwase Gihosha

Mu mumugwi umwe

Aleluya.

Ko mwazukanye na Kristu, rondere ivyiza vy’ijuru,

aho Kristu avyagiye iburyo bw’Imana.

Aleluya.

 

Ivyo dusoma mu Nkuru nziza ya Yezu Kristu nk’uko yashikirijwe na Yohani (17, 20-26)

Muri irya misi,

Yezu yariko arasenga, ahanga ijuru. Avuga ati: «Si abigishwa banje basa nsabiye, nsabiye n’abazonyemera kubera ijambo ryabo, ngo babe bose umwe, nk’uko wewe Dawe uri muri jewe nanje muri wewe, nibabe muri twebwe na bo nyene, isi yemere ko wantumye. Narabahaye ubuninahazwa wampaye, ngo babe umwe nk’uko turi umwe: jewe mbe muri bo nawe muri jewe, maze babe umwe rwose, ubumwe bwabo bwuzure, kandi isi imenye ko wantumye kandi ko wabakunze nk’uko wankunze. Dawe, abo wampaye, nshaka ko aho ndi, na bo bohabana nanje, maze barabe ubuninahazwa wampaye kuko wankunze isi itararemwa.

Dawe utunganye, isi ntiyakumenye, jeho yamara narakumenye, aba na bo baramenye ko wantumye. Narabamenyesheje izina ryawe kandi nzoribahishuka. Maze urukundo wankunze rube muri bo, nanje nyene mbe muri bo.»