Ivyo dusoma mu gitabu c’Ibikorwa vy’Abatumwa (6, 1-7)

Muri irya misi, abigishwa bariko baragwira, hanyuma Abagereki bidodombera Abahebereyi kuko abapfakazi babo batagira ikibaraba. Abatumwa icumi na babiri bakoranya abigishwa bose, bababwira bati: «Ntibibereye yuko tureka kwigisha Ijambo ry’Imana ngo turiko turafasha ku meza. None rero bagenzi, nimwitorere muri mwebwe abantu indwi b’imigenzo myiza, buzuye Mutima Mweranda, bitonda, tuzobagenere ico gikorwa. Nayo natwe, tuzoguma dushishikara ivy’ugusenga n’ivy’ukwigisha Ijambo ry’Imana.»

Iyo mpanuro ishika ku nyota abari aho bose. Baca batora Sitefano, umuntu yuzuye ukwemera na Mutima Mweranda, na Filipo, Porokori, Nikanori, Timoni, Parimenasi na Nikola umwigishwa mushasha wo mu gihugu ca Antiyokiya. Babashikiriza abatumwa; abatumwa na bo bamaze kubasabira ku Mana, babagaranzurirako ibiganza.

Ijambo ry’Imana rero rirasagamba, igitigiri c’abigishwa kirongerekana i Yeruzalemu, n’abaherezankuka benshi barayobokera ukwemera.

Icit.: Mukama, tworose urukundo rwawe,

         nk’uko ari Wewe twama twizigiye.

Canke: Aleluya. ( IZABURI 32 (33) 1-2, 4-5, 18-19)

Terere impundu Umukama, mwa bantu b’intungane,

abantu b’intungane barabereye gutera impundu.

Shemeze Umukama mu nanga,

mumucurarangire manga y’imirya icumi.

Ijambo ry’Umukama riratunganye,

ibikorwa vyiwe vyose birimwo ukuri.

Umukama akunda ingingo n’ukuri,

isi isagiriwe n’urukundo rwiwe.

Ijisho ry’Umukama rihora ku bamwubaha,

ku bizeye urukundo abafitiye;

kugira ngo abasimbishe icobo,

abakize amapfa.

Aleluya.

Kristu yarazutse,

ni we Muremyi wa vyose n’Umukiza w’abantu.

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (6, 16-21)

Yezu amaze kugwiza imikate, bugorovye, abigishwa biwe baramanuka ku kiyaga, baja mu bwato bagana hakurya y’ikiyaga, amarora i Kafaranawumi. Bwari bumaze kuzangabirana, kandi Yezu atarabahamvya; ikiyaga gisebuzwa n’igihuhusi.

Bamaze gusoza nk’istadi imirongo ibiri na zitanu canke mirongo itatu, babona Yezu agendera ku kiyaga, yegera ubwato; baragira ubwoba. We yamara arababwira ati: «Ni jewe, subize umutima mu nda.» Bashaka rero kumwuriza mu bwato, ubwo nyene ubwato bugera aho bashaka.