Ivyo dusoma mw’Ikete Umutumwa Pawulo yandikiye Abanyagalati (3, 7-14)
Ncuti zanje,
Nimumenye neza ko abishimiye ukwemera ari bo bana ba Aburahamu. Bisubiye
kandi, Ivyanditse vyarabimenyesheje bitaraba ko Imana izotunganya abanyamahanga
kubera ukwemera, iraheza iburira Aburahamu iyi nkuru nziza ngo: «Intara zose
zizohezagirirwa muri wewe.» Niho rero abishimira ukwemera bahezagirwa hamwe na
Aburahamu Nyenukwemera.
Abishimira ibikorwa vy’Ibwirizwa bose barahanamiwe n’umuvumo, kuko
handitswe ngo: «Arakavumwa uwo wese atihambirira ku vyanditswe mu gitabu c’Ibwirizwa
ngo abirangure vyose.» Ko ata n’umwe ibwirizwa rishobora gutunganya mu maso
y’Imana, ni ikiboneka, kuko «Intungane ibeshwaho n’ukwemera.» Nka ko, Ibwirizwa
ntiriva ku kwemera, ariko uwukora ayo mategeko azobeshwaho na yo. Kristu
yaducunguye umuvumo w’Ibwirizwa mu kuba Umuvumo ku bwacu, kuko handitswe ngo: «Arakavumwa
umuntu wese amanitswe ku giti», kugira ngo abanyamahanga baronkere umuhezagiro
wa Aburahamu muri Kristu Yezu, natwe ukwemera kukaturonkera Mutima w’umuhango.
Icit.: Ntaho Umukama yigeze yibagira
isezerano ryiwe. (IZABURI 110 (111) 1-2, 3-4, 5-6)
Ndaninahaza Umukama n’umutima wanje wose,
mu gihari c’aberanda no mw’ikoraniro ryabo.
Ibikorwa vy’Umukama birahambaye,
birabereve kurimburwa n’ababikunda.
Ivyo yakoze birateye iteka n’itungane,
ubutungane bwiwe buzokwamaho.
Yaradusigaranye icibukirizo c’ivyiza yagize,
eka bane Umukama ni Nyenimbabazi n’ikigongwe.
Aragaburira abamwubaha bose,
akibuka indagano ziwe ubudahengeshanya.
Yarerekanye mu bantu biwe ko bikorwa vyiwe ari akagoye,
mu kubaha iragi ry’intara zose.
Aleluya, aleluya.
Umukiza wacu Yezu Kristu yaratsinze urupfu;
yarabonesheje ubuzima n’umuco,
mu kudushikiriza Inkuru nziza.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (11, 15-26)
Muri irya misi, Yezu yari yirukanye ishetani ngo ive mu muntu w’ikiragi.
Mugabo bamwe mu bari aho bagira bati: «Yirukana amashetani kubwa Belizebuli,
umwami w’amashetani.» Abandi na bo, kugira ngo bamugeze, bamubwira bati: «Twereke
ikimenyetso kivuye mw’ijuru.»
We rero yari azi ico biyumvira, ababwira ati: «Ubwami bwose budashira hamwe
buzohona, amazu na yo agwaneko. Ko mugize ngo nirukana amashetani kubwa
Belizebuli, none shetani niyaba iriko irirwanya, ubwami bwayo buzorama bute?
Ngasangwa nanje nirukana amashetani kubwa Belizebuli, abana banyu bayirukanisha
iki? Ni co gituma bazobabera bo nyene abacamanza. Yamara ngasangwa nirukana
amashetani ku bubasha bw’Imana, Ubwami bw’Imana bwabashikiriye.
Iyo umugabo akomeye, ari n’umuheto, akararira urugo rwiwe, ivyiwe
ntakibikakaza. Ariko haramutse haje uwumurusha inguvu akamutsinda, aca amwaka
wa muheto yari yishimiye, kandi ivyo amwambuye agaca abitanga.
Uwo tudashize hamwe aranyaka, uwo twimburira kubiri arasesagura.
Iyo shetani y’ibiterasoni ivuye mu muntu, irayerera mu bunoge, irondera aho
yoruhukira, ariko ntihabone. Iraheza rero ikavuga iti: Nza kwisubirira mu nzu
yanje navuyemwo. Igarutse, isanga ata nkomakomyi, isukuye kandi isikuye.
Ikagenda noneho kuzana ibindi bishetani indwi biyisumwa ububi; vyinjiye
bikayigumanamwo, maze bikunyuka, ububi wa muntu bukaruta ubwa mbere.»