Ivyo dusoma mu gitabu c'Umuhanuzi Ezekiyeli (9, 1-7 ; 10, 18-20)

Umukama Imana ansemerera mu gutwi ati: «Mwebwe mushinzwe guhana iki gisagara, nimucegere, umwe wese atware mu minwe yiwe ico yokoresha mu gutikiza.» Abantu batandatu rero baregera, baciye ku kirimba co haruguru y'Isengero carabana n'uburaruko; umwe umwe yatwara mu minwe ico yokoresha mu gutikiza igisagara. Hagati muri bo, hari umuntu yambaye impuzu zera, afise ku mukanda ibikoresho vy’umwanditsi. Barinjira, barahagarara imbere y’uruhimbi rw’umuringa. Bwa buninahazwa bw’Imana y’Israyeli bwabora ku mukerubini buraduga ngo buje guhagarara ku kirimba c’Isengero. Umukama araheza ahamagara wa muntu yari yambaye impuzu zera kandi yari afise ku mukanda agasaho karimwo ibikoresho yy’umwanditsi, amubwira ati: «Genda unyuragire hagati mu gisagara, muri Yeruzalemu, ugeme ikimenyetso ku ruhanga rw’abantu bose baboroga bakarira kubera aya mashano yose akorerwa muri ico gisagara.»  

Ba bandi ababarira numva, ati: «Nimumukurikire munyuragire hagati mu gisagara namwe nyene, mugitere. Ntihagire uwo ijisho ryanyu riziguriza, ntihagire uwo mugirira ikigongwe: abatama n’abasore, abigeme, abana n’abagore, mubice kandi mubamare bose. Ariko, uwo wese afise ikimenyetso ku ruhanga rwiwe, ntihagire ico mumugira. Mbere, mutangurire mu ngoro yanje.» Batangurira rero ku batama bari imbere y’lsengero. Kandi Umukama ababwira ati: «Nimuhumanye iyi Sengero, ibibuga vyayo muvyuzuze imivyimba; muheze musohoke!» Barasohoka rero, baratemagura abantu mu isagara.

Ivyo biheze, ubuninahazwa bw’Umukama buragenda buva mu kirimba c’lsengero ngo buhagarare hejuru y’Abakerubini. Abakerubini baragaranzura amababa yabo, baraduga bava hasi mu maso yanje; mu gihe bagenda, imipira y’urureruzo rw’Umukama vyari kumwe. Barahagarara kw’irembo ry’ikirimba c’Isengero, ryarabana n’ubuseruko, kandi ubuninahazwa bw’Imana y’Israyeli bwari hejuru yabo. Abo ni bo vya bizima nari nabonye munsi y’lmana y’Israyeli, ku nkombe y’uruzi Kebari, ndaheza ndamenya yuko ari bo Bakerubini. Umwe umwe yari afise mu maso hane, umwe umwe yari afise amababa ane n’ibisa n’amaboko y’umuntu munsi y’ayo mababa. Mu maso, basa n’ivyo nari nabonye ku nkombe y’uruzi Kebari. Kandi bose bagenda babanze.

Icit.: Ubuninahazwa bw’Umukama

         buri hejuru y’amajuru. (IZABURI 112 (113) 1-2, 3-4. 5-6)

Bantu b’Umukama, nimuninahaze Umukama,

muninahaze izina ry’Umukama!

Izina ry’Umukama nirihezagirwe

ubu no mu myaka yose.

Kuva mu buseruko gushika no muburengero,

izina ry’Umukama nirishemezwe!

Umukama ari hejuru y’intara zose,

ubuninahazwa bwiwe buri hejuru y’amajuru.

Mbega, uwongana n’Umukama Imana yacu yova hehe,

ko mbona yurira kuvyagira mu ngoro yiwe,

akururuka kuraba ibiri mw’ijuru no kw’isi?

Aleluya, aleluya.

Ese Imana, Yo Muvyeyi w’Umukama wacu Yezu Kristu

yomurikira imishaha yacu,

kugira ngo turimbure ukwizigira kumwe rudende

yaduhamagariye.

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Matayo (18, 15-20)

Muri irya misi, Yezu yabwiye abigishwa biwe ati: «Mugenzawe agucumuyeko, genda umuhanure muri umwe n’umwe: agukundiye, uzoba umurokoye. Akwankiye, jana n’uwundi umwe canke babiri, kugira ngo ijambo rivugirwe imbere y’ivyabona bibiri canke bitatu. Akaramuka atabumviye naho, ubibwire umuryango. Niyanka kwumvira umuryango, uramuraba nk’umupagani canke nk’umutozakori.

Ni ivy’ukuri ndabibabwiye: ico muzoboha kw’isi cose kizoba kiboshwe no mw’ijuru, ico muzobohora kw’isi cose kizoba kibohowe no mw’ijuru.

Ndabibabwiye kandi: abantu babiri hano kw’isi bashize hamwe bagasaba, ico basavye cose Dawe wo mw’ijuru azokibaha. Kuko aho babiri canke batatu bakoraniye ku bw’izina ryanje, mba ndi hagati yabo.»