Ku musi wa gatatu ,igenekerezo rya 29 Ruheshi 2022, abakristu ba katolika bazohimbaza umusi mukuru wahariwe abatumwa Petero na Paulo Beranda bo  ari inkingi za Ekleziya.

Aho Yezu-Kristu aziye hano kw’isi, isinzi ry’abantu ryaciye rimukurikira ngo rimwumvirize. Abanyuzwe n’inyigisho yiwe, baguma bongerekana ku musi ku musi, kuko yagira neza aho aciye hose kandi nta n’umwe yavuga neza nka we, arico catuma abantu isinzi bamugendanira. Mur’abo bagendanyi ba Yezu,yaratoyemwo  icumi na babiri ngo bamane na we,  yaciye abita abatumwa. Muri bo, harimwo uwitwa Simoni, ariwe Yezu yahavuye yita Petero, akamugira n’umukuru w’abatumwa. Yezu yamubwiye ati: “Uri Petero no kuri iryo buye nzokwubakako Ekleziya yanje, n’ingabo za Shetani ntizizoyisenyura”(Mt.16,18).

Imbere yo kuzuka mu bapfuye agomba gusubira mw’Ijuru, Yezu yarabonekeye abatumwa cumi n’umwe kuko Yuda umwe yagurisha Yezu batari bwamusubirize,Yezu yababwiye ati: “Kwire isi yose mushikirize Inkuru nziza ikiremwa cose.”Gutyo rero yari ahejeje gushikiriza abatumwa biwe igikorwa co kubandanya gukomeza Ekleziya. Igihe naho abajije Petero gatatu kose ko amukunda, yaciye amuha ubutumwa bwo kuragira intama ziwe, amugira  umukuru n’umuyobozi w’Ekleziya, aba kandi icariho ciwe kw’isi. Petero kandi yarakoze birashimwa,arashingira intahe Yezu gushika n’aho abizira. Mu mwaka wa 64, kw’itegeko ry’umwami w’abami Neron niho Petero yatabwa mw’ibohero i Roma,ari naho yiciwe , amanitswe ku musalaba nka Yezu-Kristu.

Petero kuko yubaha cane Yezu, yaciye yisabira ko bo mubamba bomucuritse, umutwe ukaraba hasi, amaguru nayo araba hejuru.Igihe Petero na Yohani bafatwa bari i Yeruzalemu bakajanwa imbere ya sentare bahorwa kwigisha Yezu-Kristu, Petero yavuze ko bategerezwa kugamburukira Imana kuruta abantu. Hasigaye amezi make ngo Petero agandagurwe, yararemesheje abakristu b’i Roma ati: “Ni babagirira nabi muhorwa ko muri abigishwa ba Yezu-Kristu, murashimira Imana ko muri abakristu”. Yezu-Kristu yaje kw’isi asanga abayahudi bafise ukwemera kwabo gushimikiye ku mateka ya Musa be no mu nyandiko nyeranda.

 Mu bayahudi, harimwo uwitwa Sauli yamuka i Tarisi, umwe ivyabona vyashinga impuzu mu gihe Stefano mweranda yaterwa amabuye n’abayahudi ahorwa ko yemera Yezu. Ataramenya Yezu, Sauli yarahama abakristu, akabata mw’ibohero. Sauli agiye i Damas gufata abayoboka Yezu-Kristu ngo ababohe, niho umuco uvuye mw’ijuru wamuhwikira, ijwi rivuye mw’ijuru rimubwira riti: Sauli, Sauli umpamira iki? Na we yishura ati: Uri nde ga Mukama? Rya jwi riti: Ndi Yezu uriko urahama. Sauli amaze kumenya Yezu, yaciye ahindurirwa izina, yitwa Paulo,akurikira Yezu n’umutima wiwe wose n’ubwira bwinshi.

Umutumwa Paulo mweranda yaragize ingendo nyinshi aja kumenyesha  inkuru nziza ya Yezu-Kristu mu makungu iyo bataramumenya, mu bihugu vy’abapagani. Muri ubwo butumwa, Paulo yarahaboneye amagorwa menshi cane: yarakubiswe inkoni, kenshi yaragarukiye ku cobo, baramukubita ibitsibo, baramuteye amabuye, gatatu ubwato bwaramumenekanye amara ijoro n’umutaga mu nyenga. Mu ngendo yagize yama ageramiwe n’inzuzi, n’abanyamahanga, n’ibisagara hamwe n’ubugararwa,n’ibiyaga. Hari n’aho yageramirwa n’abiyita benewabo atari bo.

Akenshi yicwa n’uburuhe kubera ibikorwa vyinshi, inzara n’inyota, ukurara maso,imbeho n’ibindi, ariko icamuhagarika umutima wari umwitwarariko w’ama Ekleziya yose (2Kor.11,23 -28). Mu mwaka wa 67, niho yafatwa agatabwa mw’ibohero i Roma, niho yagandaguriwe aciwe umutwe. Mw’ibohero, yavuze ati: “Mboshwe nk’inkozi y’ikibi mporwa kumenyesha Inkuru nziza y’urukiza, ariko Ijambo ry’Imana ryo ntiriboshwe,nico gituma vyose ndiko ndabirinda ku bw’abatowe, kugira ngo nabo bashikire ubukiriro buri muri Kristu-Yezu hamwe n’ubuninahazwa bwamaho” (2Timote2,9-10).

Uko niko abo batumwa bakuru Petero na Paulo, ari bo twita inkingi za Ekleziya, babaye intwari  mu kwanka guhemuka kw’ibanga ryabo no mu kwemera Yezu-Kristu gushika gupfa kwabo,Petero na Paulo beranda, mudusabire inema y’ukugira ubutwari mu buzima bwacu.

Michel Nibitanga,CEDICOM